Omuthabali w’Obuthabali bwe Roma iya Kaisari Augusto mwahamulha athi Abayuda bosi basube ewabu eriyahandikwa. Neryo Yozefu na Maria mubaghenda e Betelehemu, eyabya erihiika lyabu Yozefu. Maria abya iniakisiya iniabutha.

Babere bakahika e Betelehemu, omwanya owa babya babwene erikalhamu yabya iye nyumba y’esyonde. Omo mwa Maria abuthira mughalha wiwe Yesu. Mwamuhira omwa lhukimba lhw’obumekeke n’erimuhira omw’ithuba.

Hakuhi ne Betelehemu, abandi balisya babya ibane omoli omwa kiro bakatheya ebihangulho byabu. Isibayitsulirye, malaika mwasa embere syabu neryo ekyakakalha ky’olhukengerwa lhwa Yehova mukyabathimbako. Abalisya mubakwa obuba, aliriryo omumalaika mwababwira athi: ‘Simubahe. Ngabawithire omwatsi mubuya. Masiya  abiributhwa munabwire e Betelehemu.’ Okwa ndambi eyo, abamalaika bangyi mubabughira omwa kyanya bathi: ‘Olhukengerwa oku Nyamuhanga omwa lhubulha n’okwa kihugho.’ Neryo abamalaika mubabulirana. Abalisya mubayowa bathi?

Abalisya mubabwirana bathi: ‘Esaha eno thughende e Betelehemu.’ Mubaghenda mubeya Maria na Yozefu ibane n’omwana wabu omwa nyumba y’esyonde.

Obuli mundu oyuwowa ebyo malaika abugha mwasweka. Maria mwalengekania kutsibu okwa bya malaika abugha kandi mwathabirirwabyo. Abalisya mubasuba eyiri ebihangulho byabu, n’erisingya Yehova busana n’ebya babirilhangira n’eriowa.