တၢ်မၤလိ ၇၀
မူခိၣ်ကလူးတဖၣ် ဘိးဘၣ်သ့ၣ်ညါဝဲဘၣ်ဃးဒီး ယ့ၣ်ၡူးအိၣ်ဖျဲၣ်ထီၣ်အဂ့ၢ်
ကဲစၢ်အီၤကူစတူး မ့ၢ်ပှၤပၢတၢ်တဂၤလၢ ရိမ့ၤအဘီအမုၢ်ပူၤလီၤ. အဝဲထုးထီၣ်တၢ်ကလုၢ်လၢ ပှၤယူဒၤဖိခဲလၢာ် ကဘၣ်က့ၤဆဲးလီၤအမံၤ လၢအဝဲသ့ၣ်အိၣ်ဖျဲၣ်ထီၣ်အလီၢ်လီၤ. အဃိ စီၤယိၤသးဒီးနီၢ်မၤရံ က့ၤဝဲဆူဝ့ၢ်ဘ့ၤသလ့ဃ့ၣ် မ့ၢ်လၢစီၤယိၤသး အိၣ်ဖျဲၣ်ထီၣ်ဝဲဖဲန့ၣ်အဃိလီၤ. ဖဲန့ၣ်အဆၢကတီၢ် ဘူးထီၣ်လၢနီၢ်မၤရံအဖိ ကအိၣ်ဖျဲၣ်ထီၣ်ဝဲလီၤ.
ဖဲအဝဲသ့ၣ်လဲၤတုၤလၢ ဝ့ၢ်ဘ့ၤသလ့ဃ့ၣ်အခါ တၢ်လီၢ်လၢအဝဲသ့ၣ်ကအိၣ်ဝဲန့ၣ် အိၣ်တ့ၢ်ထဲဂီၤဖံးကရၢၢ်လီၤ. ယ့ၣ်ၡူးအိၣ်ဖျဲၣ်ထီၣ် ဖဲတၢ်လီၢ်အဝဲန့ၣ်လီၤ. နီၢ်မၤရံဘိၣ်ထီၣ်အဖိခွါလၢ တၢ်ကံးညာ်ဒီး ပာ်မံနီၤအီၤလၢ ဂီၤဖံးအီၣ်ဆၣ်အလီၢ်လီၤ.
လၢဝ့ၢ်ဘ့ၤသလ့ဃ့ၣ်အကပၤန့ၣ် ပှၤကွၢ်သိတနီၤကွၢ်သိလၢမုၢ်နၤလီၤ. တကတီၢ်ဃီန့ၣ် မူခိၣ်ကလူးတဂၤ ဟဲလီၣ်ဖျါထီၣ်အသးလၢ ပှၤကွၢ်သိတဖၣ်အံၤအမဲာ်ညါဒီး ယဟိဝၤယွၤ အလၤကပီၤ အိၣ်ဝးတရံးအဝဲသ့ၣ်လီၤ. ပှၤကွၢ်သိတဖၣ်အံၤ ပျံၤတၢ်ဒိၣ်မးလီၤ. ဘၣ်ဆၣ် မူခိၣ်ကလူးတဂၤတဲဘၣ်အဝဲသ့ၣ်လၢ– ‘ပျံၤတၢ်တဂ့ၤ, ယကတဲဘၣ်သုလၢ တၢ်သးခုကစီၣ်တခါလီၤ. တနံၤအံၤ မ့းၡံအၤ
ဟဲအိၣ်ဖျဲၣ်ထီၣ်လၢ ဝ့ၢ်ဘ့ၤသလ့ဃ့ၣ်အပူၤလံ.’ ဖဲန့ၣ်အဆၢကတီၢ် မူခိၣ်ကလူးအါဂၤ လီၣ်ဖျါထီၣ်အသး ဒီးတဲဝဲလၢ– ‘မၤလၤကပီၤယွၤလၢမူခိၣ် ဒီးမ်တၢ်မုာ်တၢ်ခုၣ် အိၣ်ထီၣ်လၢဟီၣ်ခိၣ်ချၢတက့ၢ်.’ ဝံၤဒီး မူခိၣ်ကလူးတဖၣ်လီၤမၢ်ကွံာ်ဝဲလီၤ. ပှၤကွၢ်သိတဖၣ် မၤဝဲဒ်လဲၣ်.ပှၤကွၢ်သိတဖၣ် တဲလိာ်အသးတဂၤဒီးတဂၤလၢ– ‘ခဲအံၤ ပကဘၣ်လဲၤဆူ ဝ့ၢ်ဘ့ၤသလ့ဃ့ၣ်သၢၣ်.’ ဝံၤဒီးပှၤကွၢ်သိတဖၣ်အံၤ လဲၤဝဲဆူဝ့ၢ်ဘ့ၤသလ့ဃ့ၣ်ဒီး အဝဲသ့ၣ်ထံၣ်ဘၣ်ဝဲ စီၤယိၤသး, နီၢ်မၤရံဒီး ဖိသၣ်လၢအအိၣ်ဖျဲၣ်ထီၣ်သီသီတဂၤအံၤ အိၣ်ဝဲလၢဂီၤဖံးအီၣ်ဆၣ်လီၢ်လီၤ.
ကယဲၢ်ပှၤလၢအနၢ်ဟူဘၣ်ဝဲ တၢ်ကစီၣ်လၢ မူခိၣ်ကလူးတဲဘၣ် ပှၤကွၢ်သိတဖၣ်အံၤန့ၣ် အဝဲသ့ၣ်ကမၢကမၣ်ဝဲဒိၣ်မးလီၤ. ဘၣ်ဃးဒီးမူခိၣ်ကလူး အတၢ်ကတိၤတဖၣ်န့ၣ် နီၢ်မၤရံဆိကမိၣ်ထံဝဲဒီး တသးပ့ၤနီၣ်ဝဲနီတဘျီဘၣ်. ပှၤကွၢ်သိတဖၣ် က့ၤကွၢ်အသိ ဒီးစံးဘျုးစံးဖှိၣ်က့ၤယဟိဝၤယွၤ ခီဖျိတၢ်လၢအဝဲသ့ၣ်ထံၣ်ဒီး နၢ်ဟူဘၣ်ဝဲအဃိလီၤ.
“ယဟးထီၣ်လၢယွၤအအိၣ်, ဒီးယဟဲလီၤယဲလီၤ. အဂ့ၢ်ဒ်အံၤ, တမ့ၢ်ဘၣ်ယဟဲဒၣ်ယဲဘၣ်, မ့ၢ်အမၢလီၤယၤလီၤ.”—ယိၤဟၣ် ၈:၄၂