Kaisa Auguseto wa nyadi a Roma, wakanikina vo Ayuda awonso bavutuka muna mbanza zau za kingutukila mu kuyisonekesa. Muna kuma kiaki, Yosefe yo Maria bayenda kuna Beteleme kuna kwatuka e yitu ya Yosefe. E ntangwa ina Maria kadi wuta mwan’andi yafinama.

Vava balwaka kuna Beteleme, ke bawana diaka nzo ya lwakila ko. Muna kuma kiaki, bayenda leka muna mpak’a bulu. I mûna Maria kawutila mwan’andi Yesu. Wanzinga o nlele yo kunlekesa vana dikilwa kia twelezi.

Lukufi ye Beteleme, vakala ye avungudi ana balekanga ku mbazi mu vungula mameme mau. Vana vau, mbasi mosi watelema vana bakala, o ntemo a nkembo a Yave wabazunga. Avungudi bamona wonga, kansi mbasi wabavovesa vo: ‘Ke  numoni wonga ko. Nsangu zakiese ngina zau. Masia owutukidi o unu kuna Beteleme.’ Vana vau, mbasi zayingi zamoneka kuna zulu yo vova vo: ‘Nkembo kwa Nzambi kuna zulu, luvuvamu ova ntoto.’ I bosi, ambasi bavididi. Adieyi avungudi bavanga?

Avungudi bavovaziana vo: ‘Twenda kuna Beteleme owau.’ Bayenda kuna Beteleme mu nzaki zawonso, bawana Yosefe yo Maria muna mpak’a bulu yo mwan’au.

Awonso bawá mana ambasi bavova kwa avungudi basivika. Maria wayindulanga e mvovo mia ambasi, kasidi mio vilakana ko. Avungudi bavutuka kuna kwakala twelezi yau yo kembelela Yave mu kuma kia mana bamona yo wá.