Mubusi wa Mubuso wa Maroma, Sesare Augusto, naalaezi kuli Majuda kaufela bakutele habo bona bayo iñolisa. Kacwalo Josefa ni Maria baya kwa Betelehema, ili habo yena Josefa. Nako ya kuli Maria apuluhe nese isutelezi.

Hane bafitile mwa Betelehema, bapalelwa kufumana malobalo, sibaka sene bafumani feela neli macelo a limunanu. Maria apuluhela mwanaa hae yena Jesu mwa sicelo. Amuapesa masila abunolo mi amulobaza mwa sicelo.

Bukaufi ni Betelehema , nekunani balisana bane batonela mitapi yabona busihu. Ka sipundumukela, lingeloi layema fapilaa bona, mi nebapotolohilwe ki kanya ya Jehova. Balisana nebasabile hahulu, kono lingeloi lali ku bona: ‘Musike mwasaba. Ninani taba yende yenibata kumitaluseza. Mesia upepilwe kacenu mwa Betelehema.’ Honafo feela,  mangeloi amañata abonahala mwa mbyumbyulu, mi ali: ‘Kanya ibe mwa mahalimu ku Mulimu, mi kozo ibe fa lifasi.’ Mi mangeloi azwa fapilaa bona. Ki lika mañi zene baezize balisana hase bautwile zibiso yeo?

Balisana balelisana bali: ‘Haluyeñi kwa Betelehema honafa.’ Honafo feela, baya mi bayo fumana Josefa ni Maria mwa licelo ni mbututu yabona yesazo pepwa.

Mutu kaufela yanaautwile zeo mangeloi naabulelezi balisana, naakomokile hahulu. Maria naanahanisisize zene limubulelezi lingeloi mi naasika libala. Balisana bakutela kwa mitapi yabona, inze balumbeka Jehova kabakala zene baboni ni zene bautwile.