Kesala Akutusa, mulopwe wa Umbikalo wa bene Loma, wāelele lubila lwa amba Bayuda bonso bajokele kwabo bakelembeje. O mwanda ba Yosefa ne Madia bākutyile lwendo kebenda ku Yelusalema, kwine kwātambile kisaka kya ba Yosefa. Madia wādi na dīmi mbutwila pi.

Pobāfikile ku Betelema, kekwākidipo kyaba kwa kufikila, o mwanda bākafikile ku kipombo. Ku kino kipombo ye kwābutwidile Madia wandi mwana Yesu. Wāmuvungila mu bisandi binekena, ne kumulādika senene mu kidīlo nansha’mba mudīlanga bañombe.

Kubwipi na kibundi kya Betelema, kwādi bakumbi bamo bādi balāla panja balama luombe lwabo. Bābezemuka’tu, mwikeulu kāimene ku meso abo, ne kitōkeji kya ntumbo ya Yehova kyēbamunika. Bakumbi bāzakele, inoko mwikeulu wēbasapwila’mba: ‘Kemwakikwatwai moyo. Ndi na musapu wa nsangaji. Dyalelo, Meshiasa wabutulwa mu  Betelema.’ Ponka’pa, mūlu mwāmweka bamwikeulu bavule kēbanena’mba: ‘Ntumbo kudi Leza momwa mūlu, ne ndoe pano pa ntanda.’ Kupwa, bamwikeulu’ba bājimina. Lelo bakumbi bālongele’po namani?

Bakumbi bāanza kwineneja abo bene na bene amba: ‘Twendei’nka pano ku Betelema.’ Bāendele bukidibukidi, bātana ba Yosefa ne Madia ku kipombo ne wabo mwana wa lukeke.

Muntu yense wādi wivwana byēsambile mwikeulu na bakumbi, wādi utulumuka. Madia wālangulukīle bininge pa binenwa bya mwikeulu, kadi kāidilwe’byopo nansha dimo. Kupwa, bakumbi bājoka kukatala lwabo luombe, benda bafwija’ko Yehova pa byonso byobamona ne kwivwana.