Aju aj kawil te nimaq tnam Roma, aju César Augusto tbʼi, xi tqʼamaʼn kye kykyaqil aj Judiy tuʼn kyxiʼ tzʼibʼil kybʼi toj tnam jatumel e ul itzʼj. Tuʼntzunju xiʼ José ex María toj Belén, tuʼnju atztoq najli qe toj tja José. Chʼixtoq tpon ambʼil tuʼn tul itzʼj tal María.

Tej kypon toj Belén, oʼkx kanet jun kyja aluʼmj kyuʼn tuʼn kykyaj ten jtal, ex atztzun ul itzʼj Jesús. Bʼaj tbʼalqʼiʼn María kyoj bʼuʼẍ bʼunin ex chebʼe kubʼ tqʼoʼn toj twabʼil chej.

Nqayin ttxlaj Belén ateʼtoq junjun xqʼuqil ẍneʼl moqa rit, aʼyeju ax in che kyaj ten qonikʼen toj kojbʼil tuʼn kyxqʼuqin kyiʼj kyẍneʼl. Noq minabʼen, kubʼ tyekʼin tibʼ jun anjel ex ok kykeʼyin aju tspikʼumal tajwalil Jehová kyiʼjele. E tzaj xobʼ qe xqʼuqil ẍneʼl, noqtzun tuʼnj, xi tqʼamaʼn anjel kye: «Miʼn che tzaj xobʼe, qʼiʼn tbʼanelxix tqanil wuʼne kyeye. Ma tzul itzʼj Mesías jaʼlo toj Belén». Toj ambʼil aju, kubʼ kyyekʼin kyibʼ txqantl  anjel twitz kyaʼj in kyqʼamaʼn: «Nimanxwit tbʼi Dios toj kyaʼj, ex che tenwt xjal toj txubʼtxaj twitz Txʼotxʼ». Yajxitl, e kubʼ naj qe anjel. ¿Tiʼ bʼant kyuʼn xqʼuqil ẍneʼl?

Aʼyeqe xqʼuqil ẍneʼl in kyqʼamaʼntoq kyxolx: «Qoʼqe toj Belén bʼiʼx jaʼlo». Jun rat naj i eʼx ex kanet José ex María kyuʼn tukʼil tal neʼẍ otoq tzul itzʼj.

Kykyaqil qeju otoq tzʼok kybʼiʼn aju xi tqʼamaʼn anjel kye xqʼuqil ẍneʼl e jaw labʼin tiʼj, moqa etz kywitz tiʼj. Ok tenxix María ximel kyiʼj tyol anjel ex mintiʼx el naj tiʼj tkʼuʼj. E meltzʼaj qe xqʼuqil ẍneʼl toj kojbʼil jatumel ateʼ qe kyalun, in xi kyqʼoʼntoq chjonte te Jehová tiʼj tkyaqilju otoq kyil ex otoq kybʼi.