César Augusto diˈibë nety anaˈamp nuˈun ja it lugäär diˈib nyitënaabyë Roma, ojts niˈanaˈamë parë niˈamukë judiyëtëjk nëjkx yajkujayëdë mä të myaxuˈunkˈattë. Päätyë José mëdë María ojts nyëjkxtë Belén, mët ko jamë netyë José kyugäjpnëty. Të nety ja tiempë tpatnë parë María dyajmaxuˈunkˈatët ja uˈunk.

Ko jyäjttë Belén, kyaj nety mä lugäär parë jyäjtäˈäktët, japyë nety yˈawäˈätsëty mä jëyujk tsäjpkää tyanë, päätyë Jesus jap myaxuˈunkˈäjty. Ta María tˈabijty tˈamojtsy ja uˈunk ets ojts tkoˈoky mä jëyujk tsäjpkää yˈajëˈkxëdë.

Jam Belén käjpnbëˈääy, tamë nety näägë borreegë kuentˈäjtpë tnamäˈädë byorreegëty. Ko ajotkumonë ojts kyëxëˈëky tuˈugë anklës, ta tˈijxtë wiˈixë Jyobaa myëjˈäjtën tyëˈkxy jyajy mä nety jam yajpäättë. Ja borreegë kuentˈäjtpëty, ta jyantsy tsyëˈkëdë, per ja anklës ta  yˈanmääyëdë: “Këdii mtsëˈëgëdë, yëˈëts nyajmiimbyë oybyë ayuk. Të tyam myaxuˈunkˈaty ja Mesías jam Belén”. Ta net tˈijxtë jantsy nimayë anklës diˈib jënandëp: “Mëjkumaytyë Dios jam tsäjpotm ets yä naxwiiny, waˈan tjotkujkë diˈibë Dios kupëjkëp”. Ta ja anklës ojts nyëjkxtë. ¿Ti tyuundë ja borreegë kuentˈäjtpëty?

Ta ja borreegë kuentˈäjtpë nyayˈanmääyëdë: “Joˈomdë tyamyë Belén”. Ta netyë ojts nyëjkxtë ets jap tpattë ja maxuˈunk mëdë José etsë María mä ja jëyujk tsäjpkää tyanë.

Monyˈijx monyjäˈäwëdë pënaty myëdoowdë wiˈixë nety ja anklës të tˈanëëmëdë ja borreegë kuentˈäjtpëty. María pyawinmääy wiˈixë nety ja anklës të jyënaˈany ets ninäˈä tkajäˈäytyëgooy. Ta ja borreegë kuentˈäjtpë jyëmbijttë jatëgok mä nety ja byorreegë të tnikaˈaktë, mëjwiin kajaa tmëjjäˈäwëdë tijatyë netyë Jyobaa të tyukˈixëdë ets të tyukmëdowëdë.