Sezale Angustu, muangana ua Vuangana vua Loma, ua tumine ngecize vaYundeya vose va hiluke ku vimbonge viavo mu ku lisonekesa. Ngeci va Yosefe na Maliya va ile ku Mbetelema, kuze ku vua tundile vusoko vua Yosefe. Tele Maliya na kulisa.

Mu va ka hetele ku Mbetelema, ka va uanene cihela ceka ca ku tulila kuvanga lika mu mulaka. Mukemuo mua semukilile Yesu. Ua mu fuikile vintanga via cili na ku mu langeka mu cikasa ca ku lila vimuna.

Ku Mbetelema, vamo tuniungi va kele na ku lisa matanga avo mu musenge ku vutsiki. Kaha kangelo ua va solokelele na ceke ca vumpahu vua Yehova ca va tuililile. Tuniungi va vuile vuoma, vunoni kangelo ua va lekele ngueni: ‘Kati mu ivue vuoma. Nji na mi nehela muzimbu ua ndzolela. Lelo Mesiya na semuka mu Mbetelema.’ Ha  ntsimbu ize tungelo vavengi va solokele ha vukambuila, na ku handeka nguavo: ‘Vumpahu vu kale kuli Njambi muilu, kaha ha mavu ha kale ciyulo.’ Kaha tungelo va zimukile. Vati va lingile vaze tuniungi?

Tuniungi va lilekele umo na mukuavo nguavo: ‘Tuyenu ku Mbetelema vuovuno vene.’ Ngeci va ileko vuasi-vuasi kaha va ka uanene Yosefe na Maliya na muanavo mu mulaka.

Uose ua vuile via lekele kangelo vaze tuniungi, ua komokele. Maliya ua singaniekele cikuma ha mezi a kangelo kaha ka a suvile. Tuniungi va hilukile ku matanga avo, oku va lemesa Yehova omo lia viose vi va muene na ku ivua.