César Augusto, katli tlanauatiyaya Roma kinnauatik nochi judíos ma moamaijkuilotij kampa tlakajtoyaj. Yeka José uan María yajkej Belén, pampa José ichampoyouaj nepa euayayaj. María nechka konepiaskia.

Kema asitoj Belén, amo kipantijkej kampa mokauasej yeka mokajkej kampa kintsakuayayaj tlapialmej, uan nopaya tlakatki Jesús. María kuali kipijki nopa pilkonetsi uan yolik kitejki ipan se kuakajo kampa kintlamakayayaj tlapialmej.

Ipan nopa youali, se keskij tlakamej kinmokuitlauiyayaj inintlapialjuaj nechka Belén. Uan kiitstiuetskej se iluikaejketl, uan se tlauili kintlauilik kampa itstoyaj. Maske nopa tlakamej momajmatijkej, nopa iluikaejketl kiniljuik: “Amo ximajmauikaj. Niinmechyolmelauas kuali tlajtoli. Nama tlakatki Mesías ne Belén”. Nojkia monextijkej miakej iluikaeuanij uan  kiijtouayayaj: “Ma tijueyichiuakaj toTeotsij ne iluikak uan ma onka tlaseuilistli ipan Tlaltipaktli”. Teipa, nopa iluikaeuanij yajkej. ¿Tlake kichijkej nopa tlakamej?

Nopa tlakamej kiijtojkej: “Nimantsi ma tiakaj Belén”. Uajka nimantsi yajkej, uan kipantitoj José uan María ika nopa pilkonetsi kampa kintsakuayayaj tlapialmej.

Nochi katli kimatkej tlen nopa iluikaejketl kiniljuik nopa tlakamej san mosentlachiliyayaj. María kuali moyoliljuik tlen nopa iluikaejketl kiijtok uan amo kema kiilkajki. Nopa tlakamej tlakuepilijkej kampa kinmokuitlauiyayaj inintlapialjuaj uan tlauel kitlaskamatiliyayaj Jehová pampa kiitstoyaj uan kikaktoyaj miak tlamantli tlen kuali.