Omupangeli gwaRoma, Augustus, okwa gandja elombwelo kutya Aajuda ayehe naya shune kiilando yaandjawo ye ki inyolithe. Onkee ano, Josef naMaria oya yi kuBetlehem, hoka kwa za Josef. Pethimbo mpoka, Maria okwa li e li pokumona okanona.

Sho ya thiki muBetlehem, oya li owala ya mono ehala lyokukala moshigunda shiimuna. Maria omo a monene okanona ke, Jesus. Okwe ka dhingile momalapi e te ka langeke metemba lyokulila iimuna.

Popepi naBetlehem, opwa li aasita yamwe yiimuna ya langela iimuna yawo uusiku melundu. Ombaadhilila, omuyengeli okwa thikama puyo, neadhimo lyaJehova olye ya adhimine. Aasita oya li ya tila noonkondo, ihe omuyengeli okwa ti kuyo: ‘Inamu tila! Ngame onde mu etela onkundana tayi nyanyudha. Nena tuu ndjika muBetlehem omwa valelwa Mesiasa.’ Ombaadhilila, pomuyengeli  nguka opwe ya ongundu onene yaayengeli taya ti: ‘Esimano olyaKalunga gwokombandambanda nombili kombanda yevi.’ Opo nduno aayengeli oya zi po puyo. Mbela aasita oya ningi po shike?

Aasita oya lombwelathana ya ti: ‘Tu yeni ano kuBetlehem ngashingeyi.’ Oya yi nziyanziya noya adha Josef naMaria moshigunda shiimuna pamwe nokahanona kawo.

Ayehe mboka yu uvu shoka omuyengeli a lombwele aasita yiimuna oya li ye shi kuminwa. Maria okwa kala ta dhiladhila muule oohapu dhomuyengeli, noine dhi dhimbwa nando. Aasita oya shuna kiimuna yawo, noya pandula Jehova, omolwaayihe mbyoka ye yi uvu noye yi mono.