Mmuši wa Moroma e lego Kesara Augustose, o ile a laela Bajuda ka moka gore ba boela metseng ya gabo bona gore ba yo ingwadiša. Ka gona Josefa le Maria ba ile ba ya Betlelehema, moo Josefa a tšwago gona. Ka nako yeo, Maria o be a le kgauswi le go ba le ngwana.

Ge ba fihla Betlelehema, ga se ba ka ba hwetša phapoši yeo ba ka dulago go yona. Ka gona lefelo le nnoši leo ba bego ba ka dula go lona e be e le ka lešakeng la diruiwa. Maria o ile a belegela ngwana wa gagwe e lego Jesu gona moo. O ile a phuthela ngwana yoo ka lešela gomme a mmea gabotse ka gare ga selo seo diruiwa di jelago go sona.

Kgauswi le motseng woo wa Betlelehema, go be go na le badiši ba hlokometše dinku tša bona bošego. Gateetee morongwa o ile a ema pele ga bona gomme ba bonegelwa ke seetša se segolo sa Jehofa. Badiši bao ba ile ba tšhoga kudu, eupša morongwa yoo a re: ‘Le se ke la tšhoga. Ke le swaretše ditaba tše dibotse. Lehono Mesia o belegwe kua Betlelehema.’ Ka  yona nako yeo, gwa tšwelela barongwa ba bantši kua legodimong gomme ba re: ‘A go tumišwe Modimo legodimong, gomme mo lefaseng go be le khutšo.’ Ke moka barongwa bao ba nyamelela. Badiši bao ba ile ba dira eng?

Ba ile ba botšana ba re: ‘A re yeng Betlelehema gona bjale.’ Ba ile ba kitimela moo gomme ba hwetša Josefa le Maria ba dutše ka lešakeng ba na le lesea la bona.

Batho ka moka bao ba ilego ba kwa ditaba tšeo morongwa a di boditšego badiši bao, ba ile ba makala. Maria o ile a naganišiša ka seo morongwa yoo a se boditšego badiši bao, gomme a se se lebale. Badiši bao ba ile ba boela madišong, gomme ba leboga Jehofa ka dilo ka moka tšeo a ba bontšhitšego tšona le go ba botša tšona.