Rome binaatʼáanii Síízar Agástas éí, Jew dineʼé danihiʼdizhchı̨́ı̨́góó nidahidookah, áadi nihił daʼíídóoltah níigo yee nihoníʼą́. Jóseph éí Béthlehemdę́ę́ʼ nijigháago, Mary kʼadę́ę aʼniiłchı̨́įgo akǫ́ǫ́ bił níjítʼáázh.

Béthlehemdi daʼnijahí góneʼ doo hazʼą́ą́góó biniinaa béégashii bighan góneʼ yah ajííʼáazhgo ákóneʼ Mary ashchı̨́. Naʼatʼą́hí yilzhólígíí awééʼ bił jisdisgo béégashii yiiʼ nídaʼalchoshígíí biih jííłtı̨́.

Béthlehemgi nidaʼniłkaadii éí tłʼéeʼgo, tłʼóoʼdi dibé yaa ádahalyą́. Ńtʼééʼ diyingo ndaalʼaʼí Jiihóvah bitsʼádiʼnílíidii yee naazı̨́įgo dajiiłtsą́ągo nídadzisdzííd. Áko diyingo naalʼaʼí áháłní: ‘Tʼáadoo nídaałdzidí, haneʼ yáʼátʼéehii shee hólǫ́. Díí jı̨́ Mesáíyah Béthlehemgi biʼdizhchı̨́.ʼ Áádóó ląʼí níłchʼi ndaalʼaʼí hachʼįʼ yitʼíinii  ádaʼdiilyaago ádaaní: ‘Diyin God baa dahaʼniih, nihokááʼgóó hodéesyéél leʼ.ʼ Áádóó bikʼijįʼ doo yitʼíinii nídaasdlı̨́ı̨́ʼ. Nidaʼniłkaadii haadajiidzaa?

Nidaʼniłkaadii ádadííniid: ‘Béthlehemgóó tsxı̨́įłgo diikah.ʼ Áadi Jóseph dóó Mary dajiiłtsą́, áádóó awééʼ éí béégashii yiiʼ nídaʼalchoshígíí yiiʼ sitı̨́.

Nidaʼniłkaadii éí diyingo naalʼaʼí yaa hoolneʼígíí deidiiztsʼą́ąʼgo yikʼee bił adahóóyóí. Éí Mary hazhóʼó yaa nitsékeesgo tʼáadoo yaa yooznah da. Áádóó nidaʼniłkaadii dayiiłtsánígíí dóó deidiiztsʼą́ʼígíí Jiihóvah yichʼįʼ ahééh daniizı̨́įʼgo dibé yichʼįʼ anáákai.