Omutumini wo Roma Sesale Augustu, watumine ova Judeu aveho opo vakondoke kovilongo viavo opo vekelihonekese. Jose na Maliya avaende no ko Mbelei, oku Jose atyitilwa. Pomuvo opo Maliya uhungi kokukutula.

Etyi vehika ko Mbelei, ankho petupu apa vapondola okulalela iya avakalala mohambo. Mohambo, omo Maliya akutulila omona wae Jesus. Emuwingila pomulele emulangeka momutemba.

Popepi yo Mbelei, ankho pena ovanthita vamwe vekahi pondye pana vatulisa ovipako viavo. Liwa-liwa, akuya oandyu iya akukala otyimimi tyomunkhima wa Jeova. Ovanthita avahuvu unene, mahi oandyu aivepopila okuti: ‘Muhatilei owoma. Nemuetela onondaka onongwa. Mesiya watyitua hono mo Mbelei.’ Akumoneka onoandyu ononyingi meulu, ambupopi  okuti: ‘Huku keulu ankhimanekwe, pohi pakale ombembwa.’ Konyima onoandyu ambuende. Oityi ovanthita valinga?

Ovanthita avelipopila okuti: ‘Tuendei pehepano ko Mbelei.’ Avaende liwa-liwa avavasi Jose na Maliya nolukembe luavo mohambo.

Ovanthu aveho veiva etyi onoandyu mbapopila ovanthita avahuvu. Maliya ahinangela onondaka apopililwe no oandyu iya ehembulimbwa. Etyi ovanthita vakondoka kovipako viavo, avapandula Jeova mokonda yetyi vamona netyi veiva.