Augusto Kaisaari omutegyeki w’Obugabe bwa Rooma, akataho ekiragiro ngu Abayudaaya boona bagarukye omu tauni z’owaabo kwehandiikisa. N’ahabw’ekyo Yosefu na Mariamu bakaza Betelehemu, ahu eka ya Yosefu yaarugire. Obunaku bwa Mariamu bw’okuzaara bukaba buri haihi kuhika.

Ku baahikire Betelehemu, bakashanga hariho enju y’amatungo yonka ei baabaire nibabaasa kutuuramu. Mariamu nimwo yaazaariire omwana we w’omwojo Yesu. Akamuta omu twenda tworobi yaamubyamya omu kihongore ky’ente.

Haihi na Betelehemu, abariisa abamwe bakaba baguma aheeru nyekiro, barinzire amasyo gaabo. Ahonaaho, Maraika akeemerera haihi nabo baashangirwa ekyererezi ky’ekitiinisa kya Yehova. Abariisa bakatiina munonga, kwonka maraika akabagira ati: ‘Mutatiina.  Mbainiire amakuru marungi. Eri izooba, Mesia yaazaarwa omuri Betelehemu.’ Ahonaaho, Baamaraika baingi baakareebeka omu bicu nibagira bati: ‘Ruhanga aheebwe ekitiinisa omu iguru, n’omu nsi.’ Bwanyima baamaraika bakabura. Mbwenu shi abariisa bakakora ki?

Abariisa bakagambirana bati: ‘Mwije tuze Betelehemu.’ Bakagyenda juba baashanga Yosefu na Mariamu omu nju y’amatungo baine omwereere.

Buri omwe owaahuriire eki maraika yaagambiire abariisa akatangaara. Mariamu akateekateeka munonga aha bigambo bya maraika kandi taraabyebirwe. Bwanyima abariisa bakashanga amasyo gaabo barikusiima Yehova ahabw’ebi baareebire n’ebi baahuriire.