Ingganggan nen Cesar Augusto, say manuley na Empiryo na Roma, ya ompawil so amin ya Judio ed baley ya angiyanakan ed sikara pian manparehistro. Kanian linmay Jose tan Maria ed Betlehem ta taga ditan so pamilya di Jose. Diad saman et asingger lan mananak si Maria.

Kasabi nen Jose tan Maria ed Betlehem, anggapo lay naalmo dan napanayaman kanian dia lad kulongan na ayep so nila da. Diman inyanak nen Maria si Jesus. Binalkot toy anlemek ya abel insan to imparukol ed kuwadra ya papanganan na ayayep.

Diad uma ya asingger ed Betlehem, wala ray managpastol ya sanlabin manbabantay na saray karnero da. Biglan walay nampanengneng ed sikara ya anghel tan sinminag ed kaliberliber da so gloria nen Jehova. Ataktakot iray managpastol, balet imbaga na anghel: ‘Agkayo natatakot. Walay balibalin ibalitak ed sikayo.  Niyanak la natan so Mesias diad Betlehem.’ Insan biglan nampanengneng met so dakdakel nin anghel diad tawen, tan imbaga ra: “Nigloria so Dios ed tawen, tan diad dalin et niwalay deen.” Insan agla anengneng na saray managpastol iramay anghel. Antoy ginawa na saray managpastol?

Imbaga da: ‘Onla tayo la sirin ya tampol ed Betlehem.’ Nanapura iran linma tan nalmo day Jose tan Maria tan say kapkapangiyanak ya baby da diman ed kulongan na ayep.

Mankelaw so amin ya akarengel ed istorya na saray managpastol tungkol ed imbaga na anghel. Inisip ya maong nen Maria imay imbaga na anghel tan agton balot nilingwanan. Nen pinmawil iramay managpastol diad uma ya kawalaan na saray karnero da, akisalamat ira ed si Jehova ed amin ya anengneng tan arengel da.