Roma llajtata mandaj César Augustoca tucui judiocuna paicuna huacharishca llajtapi shuticunata quillcachichunmi mandarca. Chaimi Josepish Mariapish Belén llajtaman rircacuna. Josepaj familiaca Belenmantami carca. Mariapajca ñallami huahuata unguna horas pajtacurca.

Belenman chayajpi pozada mana tiyajpimi animalcuna shayana ucullapi saquirircacuna. Chaipimi Mariaca huahuata ungurca. Chai huashami huahuata telacunahuan maitushpa animalcuna micuna ujsha jahuapi sirichirca.

Michijcunaca Belén cꞌuchullapimi ovejacunata tuta cuidacurcacuna. Chaipimi ñapish shuj ángel ricurishpa Diospaj luzhuan achijyachirca. Michijcuna achcata mancharijpimi angelca, ‘ama manchaichijchu. Ñucaca alli huillaitami cancunaman huillaj  shamuni. Mesiasca cunanmi Belenpi huacharishca’ nircami. Chai ratomi achca angelcuna ricurishpa, ‘Yaya Diosta tucuicuna alli nichun. Cai pachapipish sumaj causaita charichun’ nirca. Qꞌuipaca angelcunaca chingarircacunami. ¿Michijcunaca imatashi rurashca canga?

Michijcunaca caishuj chaishujmi, ‘Belenman jacuchij’ nircacuna. Chai rato rishpami animalcuna shayana ucupi Mariata, Joseta, llullu huahuatapish ricurcacuna.

Michijcunaman ángel ima nishcata uyashpaca tucuicunami achcata mancharircacuna. Mariapish ángel ima nishcata cutin cutin yuyarishpami manataj cungarirca. Michijcunapish chai tucuita ricushcamanta, uyashcamantami Diosta pagui nishpa ovejacunata michinaman tigrarcacuna.