Roma nacionta kamachiq Cesar Augustom nirqa lliw Juda runakuna nacesqanku llaqtaman rispa padronachikunankupaq. Chaymi Joseywan Mariaqa Belen llaqtankuman rirqaku. Mariaqa ñam unqukunanpaqña karqa.

Belen llaqtaman chayaruspankum maypipas samanankupaq mana kaptin animalkunapa sayananpiña samarqaku. Chaypim Mariaqa unqukururqa, hinaspam wawa naceruptin pañalkunawan wankuykuspa animalkunaman qarananku artesapi siriykachirqa.

Chay llaqtapa hichpanpim michiqkunapas ovejankuta tuta cuidarqaku. Paykunamanmi qunqayllamanta Diospa angelnin rikuriykurqa, hinaptinmi muyuriqninkupi Jehova Diospa kanchayninta qawarqaku. Chaymi michiqkuna llumpayta mancharikuptinku chay angel nirqa: “Ama manchakuychikchu, sumaq willakuytam apamuchkaykichik.  Kunanmi Belen llaqtapi Diospa akllasqan nacerun”, nispa. Rimayta tukuruptillanmi hanaq pachapi achkallaña angelkuna rikurirurqa, hinaspam nirqaku: “Diosyá hatunchasqa kachun, kay pachapipas hawkayay kachun”, nispa. Chaynata niruspankum chinkarurqaku.

Chayta uyariruspankum michiqkunaqa chaylla Belenman rirqaku, hinaspam tarirurqaku Joseyta, Mariata chaynataq llullu wawachatapas.

Chay michiqkunapa willakusqankuta uyariruspankum runakunaqa uyarayarurqakuraq. Chaymi Mariapas yuyarirurqa angelpa willakusqanta. Chaymantañataqmi michiqkunaqa rikusqankumanta Diosta agradecekuspanku kutikurqaku.