Roma llactata mandaj César Augustomi tucuilla judiocuna paicuna nacirishca llactaman rishpa, paicunapa shuticunata anotachichun mandarca. Chaimi Joseca Mariata pushashpa Belén llactaman rirca. Josepa familiaca Belén llactamandami carca. Mariaca huahuaguta ungunallami carca.

Ña Belén llactaman chayashpa mingarina huasiguta na tarishpami animalcuna shayaj ucupi quedarca. Chaipimi Jesusca nacirirca. Animalcuna micuchun churana jahuapimi Mariaca chai huahuagutaca finduhuan pilluchishpa sirichirca.

Belén llacta ladopimi ‘michij runacunaca paicunapa llamacunata cuidashpa pacarinajurca’. Chaipi ‘shuj ángel paicunaman ñapash ricurijpimi, Diospa punchapamba paicunapa muyundipi punchayachijurca’. Chaita ricushpa michijcuna ninanda manllarijpimi, chai angelca nirca: ‘Na manllarinachu canguichi, ninanda cushijuna shuj ali villaitami villaj shamuni’. Cunanmi Mesiasca Belén llactapi nacirishca nishpa. ‘Shina nijujpi jahua pachamanda ashtaca angelcuna ñapash ricurishpa, Taita Diostaca cashna nishpa alicachinajurca: Jahua pachapi Taita  Diosca, punchapambagumi cangui ni tucushca cachun. Alpapi causaj gentecunapash, casilla ali causaita charichun’ nishpa. Chai jipaca angelcunaca chingarcallami. Chaita uyashpaca ¿imatata michijcunaca rurarca?

‘Chai michijcunaca caishuj chaishujmi cashna ninajurca: Belén puebloman ucha jacuchi’ nishpa. Paicuna rishpaca Mariata, Joseta huahuagutapashmi animalcunata churana ucupi tarigrirca.

Llamacunata michijcunaman chai ángel imata nishcata villajpica tucuicunami manllarishpa uyanajurca. María huarmiguca chai ángel ima nishcapi pensarishpami nunca na cungarca. Imata ricushcata, imata uyashcatapash Jehová Diosta ninanda agradicishpami llamata michijcunaca pambacunaman tigrarca.