О Цезар Август, о владетели ко Римско Царство, нарединѓа са о Евреија те џан ко дизја коте сој тане бијаме, соске сине попис. Адалеске со о Јосиф сине таро Витлеем, ов хем и Марија цидинѓе те џан адари. Панда хари и Марија ваљани сине те бијанел.

Кеда ресле ко Витлеем, единствено тхан коте со шај сине те совен сине јекх штала. Адатхе и Марија бијанѓа е Исусе. Паќарѓа ле те овел леске тато хем похари чхивѓа ле ко тхан коте со чхивена сине о хајбе е животненге.

Паше узо Витлеем, несаве пастирија сине аври раќате хем аракхена сине е бакхрен. Таро јекх пути, појавинѓа пе ленге јекх ангели хем околу ленде сине светлина со сикавела сине е Јеховаскири слава. О пастирија бут дарандиле, ама о ангели вакерѓа ленге: „Ма даран. Иси ман бут шукар хабери. Авдиве ко  Витлеем бијандило о Месија“. Ко адава моменти, ко небо појавинѓе пе бут ангелија, кола со вакерена сине: „Фалба е Девлеске сој ко небо, а мир ки Пхув“. Пало адава о ангелија таро јекх пути нашавдиле. Со керѓе о пастирија?

Јекх јекхеске вакерѓе: „Одма те џа ко Витлеем“. Тегани геле хем аракхле е Јосифе хем е Марија ки штала заедно е бебеа.

Сарине со шунѓе со вакерѓе о ангелија е пастиренге сине воодушевиме. И Марија бут размислинѓа башо лафија со вакерѓе о ангелија хем никогаш на бистерѓа лен. О пастирија иранѓе пе ко пло стадо, хем благодаринена сине е Јеховаске башо са со дикхле хем со шунѓе.