O Cezar Avgust, o vladeteli ko Rimsko Carstvo, naredingja sa o Evreija te džan ko dizja kote soj tane bijame, soske sine popis. Adaleske so o Josif sine taro Vitleem, ov hem i Marija cidingje te džan adari. Panda hari i Marija valjani sine te bijanel.

Keda resle ko Vitleem, edinstveno than kote so šaj sine te soven sine jekh štala. Adathe i Marija bijangja e Isuse. Pakjargja le te ovel leske tato hem pohari čhivgja le ko than kote so čhivena sine o hajbe e životnenge.

Paše uzo Vitleem, nesave pastirija sine avri rakjate hem arakhena sine e bakhren. Taro jekh puti, pojavingja pe lenge jekh angeli hem okolu lende sine svetlina so sikavela sine e Jehovaskiri slava. O pastirija but darandile, ama o angeli vakergja lenge: „Ma daran. Isi man but šukar haberi. Avdive ko  Vitleem bijandilo o Mesija“. Ko adava momenti, ko nebo pojavingje pe but angelija, kola so vakerena sine: „Falba e Devleske soj ko nebo, a mir ki Phuv“. Palo adava o angelija taro jekh puti našavdile. So kergje o pastirija?

Jekh jekheske vakergje: „Odma te dža ko Vitleem“. Tegani gele hem arakhle e Josife hem e Marija ki štala zaedno e bebea.

Sarine so šungje so vakergje o angelija e pastirenge sine vooduševime. I Marija but razmislingja bašo lafija so vakergje o angelija hem nikogaš na bistergja len. O pastirija irangje pe ko plo stado, hem blagodarinena sine e Jehovaske bašo sa so dikhle hem so šungje.