O kralj Avgust, o vladari ko Rimsko carstvo, naredindža sa o Jevreja te džan ko dizja kuri tane bijande, sose hine popis. Odoljese so o Josif hine ando Vitlejem, ov hem i Marija morandilje te džan uduri. Pana hari, i Marija valjandža te bijani.

Ked reslje ko Vitlejem, jedino than kuri šaj hine te soven hine ki jekh štala. Odothe, i Marija bijandža e Isuse. Pačardža lje hem pohari čhivdža lje ko than kuri čhivela pe e životinjendže te han.

Paše uzo Vitlejem, disave pastirija račate hine avri hem arakhlje e bakren. Ando jekh puti, pojavindža pe ljendže jekh anđeo hem uzo ljeste hine i svetlost koja mothovdža e Jehovasi slava. O pastirija but darandilje, ama o anđeo phendža ljendže: „Ma daran. Isi man but šukar haberi. Avdije ko Vitlejem bijandilo o Mesija.“ Ko odova trenutko, ko nebo pojavindže pe but anđelija, hem  phendže: „Slava e Devljese kova tano ko nebo, a mir ki phuv.“ Palo odova, o anđelija ando jekh puti našaldilje. So čerdže o pastirija?

O pastirija phendže jekh jekhese: „Hajde odmah te dža ko Vitlejem.“ On dželje hem arakhlje e Josife hem e Marija ki štala zajedno e bebaja.

Sare hine oduševime ked šundže odova so phendže o anđelija e pastirendže. I Marija but razmislindža ando lafija kola vačerdže o anđelija hem niked na bisterdža ljen. O pastirija irindže pe ko poklo stado hem zahvalindže pe e Jehovase aso sa so dikhlje hem šundže.