ISOMO RYA 70
Abamarayika batangaza ko Yesu yavutse
Umwami w’Abami w’Umuroma witwaga Kayisari Awugusito yategetse Abayahudi kujya kwibaruza mu midugudu bavukiyemo. Bityo rero, Yozefu na Mariya bagiye i Betelehemu kuko ari ho Yozefu yakomokaga. Icyo gihe Mariya yari hafi kubyara.
Igihe bageraga i Betelehemu, babuze icumbi barara mu kiraro cy’amatungo. Aho ni ho Mariya yabyariye Yesu, amufureba mu bitambaro amuryamisha aho amatungo arira.
Hafi y’i Betelehemu, abashumba bari baraye hanze barinze imikumbi yabo. Bagiye kubona babona umumarayika ahagaze imbere yabo, umucyo w’ikuzo rya Yehova urabagota. Abo bashumba bagize ubwoba bwinshi, ariko uwo mumarayika arababwira ati “mwitinya, kuko nje kubabwira inkuru nziza. Mesiya yavukiye i Betelehemu.” Muri ako kanya, babona abamarayika benshi mu kirere, basingiza Imana bagira bati “mu ijuru icyubahiro kibe icy’Imana, no ku isi habeho amahoro.” Hanyuma abo bamarayika baragenda. None se abo bashumba bakoze iki?
Abo bashumba barabwiranye bati “nimuze tujye i Betelehemu.” Bahise bajyayo basanga Yozefu na Mariya mu kiraro bari kumwe n’uruhinja rwabo.
Abumvaga ibyo umumarayika yari yabwiye abo bashumba baratangaraga cyane. Mariya yatekereje yitonze ku magambo y’uwo mumarayika kandi ntiyigeze ayibagirwa. Hanyuma abo bashumba basubiye mu mikumbi yabo, bagenda basingiza Yehova bitewe n’ibyo bari bumvise n’ibyo bari babonye.
‘Naje nturutse ku Mana none ndi hano. Sinaje nibwirije, ahubwo ni Yo yantumye.’—Yohana 8:42
Ibindi wamenya
TWIGANE UKWIZERA KWABO
Mariya—‘Yajyaga atekereza’ kuri ayo magambo
Ibyabaye kuri Mariya igihe yari i Betelehemu byakomeje ukwizera kwe kandi bituma arushaho kwiringira amasezerano ya Yehova.
YESU NI INZIRA, UKURI N’UBUZIMA
Yesu yahawe icyubahiro mbere y’uko avuka
Elizabeti n’umwana yari atwite bahaye Yesu icyubahiro bate?
YESU NI INZIRA, UKURI N’UBUZIMA
Yesu yavutse ryari kandi se yavukiye he?
Tuzi dute ko Yesu atavutse ku itariki ya 25 Ukuboza?
