Roomu gashshaanchi Qeesaari Awugisxoosi, baalunku Ayihudete manni borreessamate ilamino gobba haˈranno gede hajajino. Konni daafira, Yooseefinna Maariyaami Beeteliheme haˈri; bashsho Yooseefi ayiddi heeˈrannohu Beetelihemeteeti. Hatte yannara Maariyaami ila rakke no.

Insa Beeteliheme iilliti galanno mine hoogino daafira, saada galtannowa galino. Hakkiicho Maariyaami Yesuusa iltu. Hakkiinni ise qaaqqo hoccunni xaxxe saadate hayisso worranni badiri aana sununni assite goxissu.

Hakko hashsha Beetelihemete katami mule allaalaasine gobba geˈreewo allaaˈlite no. Hedeweelcho sokkaasinchu insara albaanni uurri, hattono Yihowahu ayirrinyu xawaabbi qooxeessinsara xawi. Allaalaasine lowo geeshsha waajjitino; sokkaasinchu kayinni togo yiinsa: ‘Waajjitinoonte. Dancha duduwo kulammoˈnera dayoommo.  Beetelihemete katamira Mesihichu ilamino.’ Hatte yannara lowo sokkaasine gordoho leeltanni, ‘Iima gordoho Maganoho ayirrinyu ikkosi! Baattote aanano keeru ikko’ yitu. Hakkiinni hatti sokkaasine hadhu. Allaalaasine ma assituyya?

Allaalaasine mimmito, ‘Kaˈe Beeteliheme haˈnona’ yitu. Hakkiinni insa rakke Beeteliheme hadhu; hakkiicho insa Yooseefinna Maariyaami saada galtannowa qaaqqinsa ledo noore affu.

Sokkaasinchu allaalaasinete kulinonsare macciishshino manni baalu dhagge assiˈri. Maariyaami sokkaasinchu coyiˈrinore seekkite heddino, hattono ise konne coye horo dihabbino. Allaalaasine laˈinonna macciishshitino coyi daafira Yihowa galattanni geˈreewinsawa higgino.