Nampiboaky didy Aogosto Kaisara, mpanjakani-Fanjakà Romanina hoe tsy maintsy moly amy ty tanàny ty Jiosy iaby mba hosoraty anara. Farany nandeha a Betlehema any Josefa noho Maria, satria any ty tanà niaviani-Josefa. Fa marìny hiteraky Maria tamy fotoa zay.

Lafa niavy a Betlehema any rozy, le nipetraky tamy tranom-biby zay tao. Tao ty niterahani-Maria ani-Jesosy. Nifonosany tamy lamba zay ie, le nampiroroany tamy fasia hanim-biby rey tao.

Nisy mpiaraky aondry rezay niamby ty aondrin-drozy tan-tonda marìny ani-Betlehema teny, tamy haly iny. Tampoky teo, le nisy anjely raiky nitsanga talohan-drozy teo, ka namirapiratsy nanodidy an-drozy ty voninahitsini-Jehovah. Natahotsy mpiaraky aondry rey, fe nivola anjely iny hoe: ‘Ka matahotsy, fa hanambara vaovao soa aho. Nateraky a Betlehema ao nandroany ty Mesia.’ Bakeo nisy anjely  maro biby tan-danitsy eny. Nivola ho zao rozy: ‘Voninahitsy ho a Ndranahary an-danitsy any, le fiadana ho an-tany etoa.’ Bakeo, avy le nanjavo anjely rey. Nanao akory mpiaraky aondry rey?

Nifampiresaky mpiaraky aondry rey hoe: ‘Ndao malaky tsika handeha a Betlehema any.’ Nandeha amy zay rozy, le nihitan-drozy tamy tranom-biby tao Josefa noho Maria noho anakajà vo nateraky iny.

Nitseriky iaby ty olo lafa naharè ty raha nivolanini-anjely rey tamy mpiaraky aondry rey. Nametsivetsy soa ty raha nivolanini-anjely rey Maria, le tsy nihalinony mihintsy raha zay. Nimpoly tamy aondrin- drozy rey tany amy zay mpiaraky aondry rey. Nisaotsy ani-Jehovah rozy tamy raha iaby nihitan-drozy noho niren-drozy rey.