Umbusi waseRoma, Khesari Agustusi, wakhipha umyalo wekutsi onkhe emaJuda abuyele emadolobheni akubo kute ayewubhaliswa. Ngako boJosefa naMariya bahamba baya eBhetlehema lapho umndeni waJosefa bewuchamuka khona. Besesisondzele sikhatsi sekutsi Mariya atale umntfwana.

Nabefika eBhetlehema, indzawo lekuphela kwayo lebeyikhona lebebangahlala kuyo bekungumkhombe. Mariya wayitalela lapho indvodzana yakhe Jesu. Wayigoca kahle ngetindvwangu wabese uyibeka lapha emkhombeni ngesineke.

Edvute naseBhetlehema, bekunebelusi lebebahlala ngaphandle ebusuku beluse imihlambi yabo. Ngekushesha, ingilosi yema embikwabo futsi inkhatimulo yaJehova yabakhanyisela. Labelusi befikelwa kwesaba, kepha lengilosi yatsi: ‘Ningesabi! Nginiphatsele tindzaba  letimnandzi. Mesiya utelwe lamuhla eBethlehema.’ Ngaleso sikhatsi, kwabonakala tingilosi letinyenti ezulwini, titsi: ‘Ludvumo aluye kuNkulunkulu ezulwini, nekuthula kube semhlabeni.’ Letingilosi tase tiyanyamalala. Benta njani labelusi?

Labelusi bakhuluma bodvwa batsi: ‘Asivele sihambe siye eBhetlehema.’ Bahamba ngekushesha futsi batfola Josefa naMariya lena emkhombeni neluswane lwabo lolusandza kutalwa.

Wonkhe umuntfu loweva loku lobekushiwo ngulengilosi kulabelusi wamangala. Mariya wacabangisisa ngaloko lokwashiwo ngulengilosi futsi akazange akukhohlwe. Labelusi babuyela emihlambini yabo, babonga Jehova ngato tonkhe letintfo lebebativile nalebebatibonile.