Nandily ty Aogosto Kaisara Mpanjaka i Roma, fa toko’e holy amy ty tanà’e iaby o Jiosio mba hisoratse agnaragne. Nandeha mba Betlehema mbeo areke ty Josefa naho i Maria, satria tao ty tane niavia ry Josefa. Fa narine hiterake ka ty Maria tamy izay.

Naho fa niavy tao iareo, le zolok’agnombe ty sisa niazo iareo nipetrahagne. Tao ty niteraha i Maria i Jesosy. Nasia iareo salaka matevegne reke, le nampiroroe iareo tamy i fihinanan’agnombey eo.

Niarak’agnondry tamy ty teteke marine i Jerosalema ty mpiarak’agnondry ila’e tamo o halegne iohoe. Tampoke teo, le nisy anjely nitsangagne taloha iareo teo sady feno ty voninahy i Jehovah. Natahotse i mpiarak’agnondry rey, faie hoe i anjelỳ: ‘Ko matahotse, fa misy vaovao soa hataliliko anareo. Naterake a Betlehema ao androany ty Mesia.’ Tamy izay, le nisy anjely maro niseho ty tamy  i lagnitsey ey nanao tihoe: ‘Voninahitse ho an’Andrianagnahare an-dagnitse agne, fa fiadanagne hoahy ty ndaty ambone taney.’ Akore ty natao i mpiarak’agnondry rey?

Nifampirehake iareo tie: ‘Andao ho a Betlehema agne.’ Nimbeo malaky iareo, le nahatrea i Josefa naho i Maria vaho i ajaja menay.

Gaga ze ndaty teo naho fa natalily i mpiarak’agnondry rey ty raha rineha i anjelỳ tamy iareo. Ndra i Maria ka nieretseretse ty raha rineha i anjelỳ sady tsy nagnaligno izay. Niheregne tan-teteke agne i mpiarak’agnondry rey sady nisaotse i Jehovah tamy ze raha nitrea iareo naho nirey iareo.