Sisar Ogastus, em man i bosim Gavman Rom, i tokim olgeta Juda long go bek long asples bilong ol na rejistaim nem bilong ol. So Josep na Maria i go long Betlehem, em ples bilong famili bilong Josep. Taim bilong Maria long karim bebi i klostu.

Taim ol i kamap long Betlehem, wanpela ples tasol ol inap stap em haus bilong ol animal. Long dispela hap, Maria i karim Jisas. Em i pasim em long hap laplap i malumalum na slipim em isi long bokis kaikai bilong ol animal.

Klostu long Betlehem, sampela wasman bilong sipsip i stap ausait na was long ol sipsip long nait. Wantu, wanpela ensel i sanap long fran bilong ol na lait bilong glori bilong Jehova i raunim ol. Ol wasman bilong sipsip i pret, tasol ensel i tokim ol: ‘No ken pret. Mi gat gutpela nius. Mesaia i bon long dispela de  long Betlehem.’ Long dispela taim stret, planti ensel i kamap long skai, na tok: ‘Givim glori long God long heven, na long graun bel isi i stap.’ Bihain ol ensel i no stap moa. Ol wasman bilong sipsip i mekim wanem?

Ol wasman i tokim narapela narapela: ‘Yumi mas go hariap long Betlehem.’ Kwiktaim ol i go na lukim Josep na Maria na nupela bebi bilong ol long haus bilong ol animal.

Olgeta man i kirap nogut taim ol i harim tok ensel i mekim long ol wasman bilong sipsip. Maria i tingim gut tok bilong ensel na em i no lusim tingting. Ol wasman i go bek long ol sipsip, na ol i tenkyu long Jehova long ol samting ol i lukim na harim.