Khezari Augustu, a hosi ya Mufumo wa Roma, i no laya lezvaku a vaJudha vontlhe vaya lomu va nga pswaliwa kona lezvaku va ya tsalelwa. Hikwalaho, Josefa na Mariya va no endza va ya le Bhetlehema, lomu a maxaka ya Josefa ma nga pswalelwa kona. Ka cikhati leco, ma wa chikela masiku ya ku Mariya a phuluka.

A cikhati leci Josefa na Mariya va nga chikela le Bhetlehema, ku wa nga hi na kun’wani ko tshama kona, ku wa no sala ranga basi. Hi kwalomo Mariya a nga mu pswalela kona a n’wana wakwe Jesu. I no mu phutsela lomu ka nguwo ya yi nene, a mu lata khwatsanyana lomu ka cigowolo.

Ka wutshamu go kari ga laha kusuhani ni Bhetlehema, ku wa hi ni varisi vo kari va nga hi lahandle va risa zvifuyo zvabye ni wusiku. Laha va nga hi kona, ku no ta yima ngilozi hi citshuketi zvonake va randzelwa hi kungangamela ka Jehovha. A varisi va no sangula ku chava. Kanilezvi,  a ngilozi yi no va byela lezvi: ‘Mu nga chavi. Ndzi na ni mahungu yo tsakisa. Nyamutlha ku pswalilwe Mesiya le Bhetlehema’. Ka cikhati caleco, ku no woneka tingilozi to tala le tilweni, tiku: ‘A dzundziwe Nungungulu le tilweni. Laha misaveni a kuve ni kurula’. A tingilozi ti no gumesa ti nyamalala. Zvini lezvi a varisi va nga maha?

Va no byelana lezvi: ‘A hi fambeni Bhetlehema zvezvi’. Va no tekela ku famba hi kuhatlisa zvonake va ya kuma Josefa na Mariya lomu rangeni ni n’wana wabye a nga ha hi ku pswaliwa.

Vontlhe va ngazwa lezvi a tingilozi ti nga byela varisi va no hlamala. Mariya i no alakanyela nguvhu hi lezvi a tingilozi ti nga wula, niku a nga tshukangi a zvi rivala. A varisi va no tlhela va ya vhikela zvifuyo zvabye, na va bonga Jehovha hi zvontlhe lezvi va nga zvi wonile ni ku zvizwa.