Рим империяның чагырыкчызы Август Цезарь иудей чоннуң чизезин тургузар деп чарлык үндүрген. А ону кылыр дизе, кижи бүрүзү бодунуң төрээн хоорайынче чанар ужурлуг турган. Ынчангаш Иосиф биле Мария Иосифтиң хоорайы Вифлеемче чорупкан. А Мария удавас божуур турган.

Вифлеемде хоначалар бажыңында хостуг чер чок боорга, олар мал кажаазынга доктаап алган. Аңаа Мария Иисусту божупкан. Ол ону чымчак пөске чөргектээш, мал чемгерер шагжага чыттырып каан.

Ол дүне Вифлеемден ырак эвеске кадарчылар мал-маганын кадарып турган. Хенертен оларга ангел көстүп кээрге, Иеговадан өндүр улуг чырык чырый берген. Кадарчылар аажок корга бээрге, ангел оларга: «Кортпаңар, мен силерге эки медээ эккелдим. Бөгүн  Вифлеемге Мессия төрүттүнер» — деп чугаалаан. Ол-ла үеде дээрге дыка хөй ангелдер көстүп келгеш: «Өндүр улуг Бурганга алдар, черге амыр-тайбың доктаазын!» — деп ырлажып эгелээн. Оон ангелдер көзүлбейн барган.

Ынчан кадарчылар: «Вифлеемче дүрген чоруулуңар!» — дээн. Олар ынаар дүвү-далаш чеде бергеш, Марияны, Иосифти база чаш төлдү тып алганнар.

Ангелдиң кадарчыларга чүнү чугаалаанын улус дыңнааш, аажок кайгап турган. Мария ангелдиң сөстериниң дугайында хөй боданып, ону кажан-даа утпайн чораан. Кадарчылар мал-маганынче дедир чорупкан. Олар көрген база дыңнаан чүүлү дээш Иеговага өөрүп четтиргенин илередип турган.