Te ajwalil yuʼun te lum Roma jaʼ te Augusto César, la yal te yakuk xbajtʼik spisil te judioetik ta slumalik te banti ayinik swenta ya yakʼ ta otsesel sbiilik ta jun. Jich yuʼun te José sok te María bajtʼik ta Belén, melel te sfamilia te José tey ayik-a. Jtebxanix ya skʼan ya x-ayin te alal yuʼun te María.

Kʼalal kʼotik ta Belén, te bantinax la staik lugar yuʼun ya skux yoʼtanike, jaʼ ta sna wakax sok tey ayin-a te Jesuse. Te María la spots ta kʼunil pakʼ sok kʼunax la smejtsʼan ta skanoa wakax.

Ta nopol Belén, ay chaʼoxtul jkanantuminchijetik te yakik ta skanantayel stuminchijik ta sjunal ajkʼabal. Ta oranax, chiknaj jtul chʼul-abat sok la yilik te xojobaj yutsilal te Jehová ta sjoyobalik. Te jkanantuminchijetik xiwik yuʼun, pero jich albotik yuʼun te chʼul-abate: “Mame xiwex, ya kalbeyex awaʼiyik lekil kʼopetik. Yoʼtik ta Belén ayinix  te Mesiase”. Oranax chiknaj bayal ta tul chʼul-abatetik ta chʼulchan te jich yakik ta yalel: “Bayal yutsil te Dios ta chʼulchan sok ayuk lamalkʼinal ta Balumilal”. Te chʼul-abatetike tupʼik bael. ¿Bin la spasik te jkanantuminchijetike?

Te jkanantuminchijetik la yalbey sbaik: “Konik ta Belén ta ora ini”. Jich yuʼun bajtʼik ta oranax, tey kʼot staik-a te José, te María soknix te alal te ayinelto ta sna wakaxe.

Spisil te machʼatik la yaʼiyik stojol te bin la yal te chʼul-abat ta stojol te jkanantuminchijetike, chamnax yoʼtanik yuʼun. Te María la snop ta yoʼtan te bin la yal te chʼul-abat sok maʼyuk bin-ora chʼay ta yoʼtan. Te jkanantuminchijetik sujtik bael ta akiltik te banti jil te tuminchijetik yuʼunike, la yalbeyik wokol te Jehová yuʼun te bin la yilik sok te bin la yaʼiyik stojole.