Li ajvalil ta Roma ti Sesar Augusto sbie, laj yalbe mantal judioetik ti akʼo xbat stsak sbiik li ta slumal ti bu vokʼike. Ta skoj ti likemik ta Belen li yutsʼ yalal Josee jaʼ te bat stsak sbiik, li vaʼ orae jutuk xa ox skʼan xvokʼ li Jesuse.

Kʼalal kʼotik ta Belen li Jose xchiʼuk Mariae muʼyuk bu la staik junuk na ti bu xuʼ xkomike, jaʼ yuʼun jaʼ te komik ta snail vakax, vaʼun jaʼ te vokʼ li Jesuse. Li Mariae la xpix ta jun kʼunil pokʼ li Jesuse. Vaʼun te la xpuchʼan ta sveʼeb vakax.

Oy junantik jkʼel chijetik ti te yakal xchabiik xchijik ta osiltik li ta nopol Belene. Vaʼun ta ora noʼox vinaj tal yaj-anjel Jeova ta stojolalik, vaʼun joyobtabil kʼotik ta xojobal Jeova xchiʼuk xiʼik tajek. Pe xi albatik yuʼun li anjele: «Mu xaxiʼik, yuʼun ¡Kʼelo avilik!, tal kalboxuk lekil aʼyejetik yuʼun vokʼ xa ta Belen li Mesiase». Ta ora noʼox te vinaj tal yan epal anjeletik  ta vinajel ti xi chalike: «Akʼo junuk yutsil slekilal li Dios ti te oy ta toyole xchiʼuk junuk yoʼontonik li krixchanoetik ta sba balumile». Ta tsʼakale sak chʼayik batel li anjeletike. ¿Kʼusi van ta spasik li jkʼel chijetike?

Jaʼ yuʼun xi laj yalbe sbaik li jkʼel chijetike: «Skʼan tukʼ xijbat ta ora li ta Belene». Vaʼun batik ta ora xchiʼuk te kʼot staik ta jun snail vakax li Jose, Maria xchiʼuk li uni neneʼe.

Kʼalal laj yaʼiik yan krixchanoetik li kʼusi kʼot ta stojolal li jkʼel chijetike toj labal sba laj yaʼiik. Li Mariae la snopbe skʼoplal li kʼusi laj yal li anjeletike xchiʼuk muʼyuk bu xchʼay-o ta sjol. Li jkʼel chijetike chaʼsut skʼelik li xchijike xchiʼuk la stojbeik ta vokol Jeova ta sventa li kʼusi laj yilik xchiʼuk li kʼusi laj yaʼiike.