Hi Cesar Agusto nga magmarando han Imperyo han Roma nagsugo nga an ngatanan nga Judio umuli ha ira natawohan nga syudad basi magparehistro. Salit nagbiyahe hira Jose ngan Maria ngadto ha Betlehem, diin nagtikang an pamilya ni Jose. Hito nga panahon, tipag-aranak na hi Maria.

Pag-abot nira ha Betlehem, waray na hira iba nga makaturogan kondi ha kwadra na la. Didto, nag-anak hi Maria kan Jesus. Ginputos niya hi Jesus hin lampin ngan hinay-hinay nga ginbutang ha sabsaban.

Hirani ha Betlehem, may mga paraataman hin karnero nga nakadto ha gawas basi bantayan an ira mga panon. Tigda la nga may anghel nga nagpakita ha ira ngan naglamrag an ira palibot tungod han himaya ni Jehova. Nahadlok hira, pero an anghel nagsiring: ‘Ayaw kamo kahadlok.  May makalilipay ako nga sumat. An Mesias natawo yana ha Betlehem.’ Hito mismo nga takna, nagpakita an damu nga anghel ngan nagsiring: ‘Pagdayawon an Dios ha langit, ngan ha tuna kamurayawan.’ Katapos, nawara an mga anghel. Ano an ginbuhat han mga paraataman?

An mga paraataman nagsiring ha kada tagsa: ‘Pakadto dayon kita ha Betlehem.’ Kinadto dayon hira ngan didto nakita nira ha kwadra hira Jose ngan Maria upod han ira natatawo pa la nga anak.

Nanhipausa an mga nakabati ha iginsumat han mga paraataman nga ginsiring ha ira han anghel. Ginhinunahuna ni Maria an ginsiring han anghel ngan waray gud niya ito kalimti. Binalik an mga paraataman hin karnero ha ira mga panon, ngan ira ginpasalamatan hi Jehova ha ngatanan nga ira hinkit-an ngan hinbatian.