César Augusto, le máax gobernartik u luʼumil Romaeʼ tu yaʼalaj ka xiʼik tuláakal le judíoʼob u tsʼíibt u kʼaabaʼob teʼ kaaj tuʼux síijoʼoboʼ. Le oʼolal José yéetel Maríaeʼ binoʼob tu kaajil Belén tumen tiʼ u taal u láakʼtsiloʼob Joseiʼ. Teʼ kʼiinoʼoboʼ jach taʼaytak u síijil u chaambal María.

Ka kʼuchoʼob Beleneʼ maʼ tu kaxtoʼob tuʼux u pʼáatloʼobiʼ, le oʼolal pʼáatoʼob teʼ tuʼux ku kanáantaʼal le baʼalcheʼoboʼ. Teʼeloʼ tiʼ síij Jesusiʼ. Maríaeʼ tu báatsʼtepʼtajeʼ ka tu chaambel chikúuntaj teʼ tuʼux ku tsʼaʼabal u yoʼoch le baʼalcheʼoboʼ.

Naatsʼ Beleneʼ yaan kaʼach jujuntúul j-kanan tamanoʼob ku pʼáatloʼob bul áakʼab teʼ kʼáax u kanáant u yalakʼ tamanoʼoboʼ. Chéen ka téek chíikpaj juntúul ángel tiʼob, ka tu yiloʼob u léembal u nojbeʼenil Jéeoba tu baʼpachoʼob. Letiʼobeʼ jach sajakchajoʼob, chéen baʼaleʼ le angeloʼ tu yaʼalajtiʼob: ‹Maʼ a chʼaʼikeʼex saajkil, taalen in tsʼáa a wojéelteʼex junpʼéel jatsʼuts baʼal. Bejlaʼa síij le Mesías tu kaajil Belenoʼ›. Teʼ súutukoʼ chíikpaj  yaʼab angeloʼob teʼ kaʼanoʼ ka joʼopʼ u yaʼalikoʼob: ‹Nojbeʼenkúuntaʼak Dios teʼ kaʼanoʼ yéetel ka yanak jeetsʼelil teʼ Luʼumaʼ›. Ka tsʼoʼokeʼ lukʼ le angeloʼob tu yiknaloʼoboʼ. ¿Baʼax túun tu beetaj le j-kanan tamanoʼoboʼ?

Letiʼobeʼ joʼopʼ u yaʼalikoʼob: ‹Koʼoneʼex tu kaajil Belén›. Letiʼobeʼ tu séebaʼanil úuchik u binoʼob, ka kʼuchoʼobeʼ tu yiloʼob José, María yéetel le chaambal táant u síijil teʼ tuʼux ku kanáantaʼal le baʼalcheʼoboʼ.

Le j-kanan tamanoʼoboʼ tu tsikbaltoʼob le baʼax aʼalaʼabtiʼob tumen le angeloʼ. Tuláakal le máaxoʼob chʼenxikintoʼ jach jaʼakʼ u yóoloʼob. Maríaeʼ jach tu tsʼáaj tu puksiʼikʼal le baʼaxoʼob tu yaʼalaj le angeloʼ yéetel mix bikʼin tu tuʼubsaj. Le j-kanan tamanoʼoboʼ suunaj u yil u yalakʼ tamanoʼob teʼ kʼáaxoʼ. Letiʼobeʼ jach tu tsʼáajoʼob u graciasil tiʼ Jéeoba yoʼolal le baʼaxoʼob tu yiloʼob yéetel tu yuʼuboʼoboʼ.