Porsea do angka halak di timur ni Israel, na boi do bintang patuduhon dalan tu nasida. Di sada tingki, diida nasida ma adong na songon bintang di langit. Mardalan ma bintang i, jala diihuthon nasida ma i sahat tu Jerusalem. Disungkun nasida ma tu angka halak disi, ‘Didia do tahe dakdanak na laho gabe raja ni halak Jahudi i? Alana naeng marsomba do hami tu ibana.’

Si Herodes do raja di Jerusalem. Tingki dibege ibana laho adong raja na baru, marsak ma ibana. Disungkun ma tu angka malim, ‘Didia do tubu dakdanak na laho gabe raja i?’ Didok angka malim ma, ‘Didok angka panurirang, di Betlehem do ibana tubu.’ Dung i, dijou si Herodes ma halak na sian Timur i. Ninna ma, ‘Laho ma hamu tu Betlehem. Lului ma dakdanak i, dung i paboa ma tu ahu. Asa dohot ahu marsomba tu ibana.’ Alai margabus do ibana.

Mardalan ma muse bintang i. Diihuthon angka baoa i ma bintang i sahat tu Betlehem. Dung i, so ma bintang i di ginjang ni sada jabu. Masuk ma nasida, diida ma Jesus rap dohot omakna, si Maria. Marsomba ma nasida tu dakdanak i. Dilehon nasida ma angka hadiah, songon mas, kemenyan dohot mir. Jahowa do na manuru nasida mangalului Jesus? Daong.

Di borngin i, ro ma Jahowa tu nipi ni si Josep. Didok ma, ‘Naeng dibunu si Herodes do Jesus. Laho ma ho tu Mesir. Boan ma istrim dohot anakmi. Disi ma hamu sahat tu na aman situasi.’ Diboan si Josep ma si Maria dohot Jesus tu Mesir.

Diorai Jahowa ma angka baoa na sian Timur i mulak tu si Herodes. Dung diboto si Herodes na so ro be nasida, gabe muruk ma ibana. Diparentahon ibana ma asa dipamate sude dakdanak baoa na sarupa umurna dohot Jesus. Alai nunga di Mesir be Jesus. Jadi ndang dohot be ibana dipamate.

 Dung i, mate ma si Herodes. Didok Jahowa ma tu si Josep, ‘Mulak ma hamu, nunga aman be saonari.’ Mulak ma si Josep, si Maria dohot Jesus tu Israel. Tinggal ma nasida di kota Nasaret.