Emwa eso ni rre odẹ ahọ ọghe otọ Izrẹl yayi wẹẹ orhọnmwẹ gha sẹtin dia iran. Vbe asọn ọkpa, ikpia eso ni ke odẹ Ahọ rre keghi bẹghe emwi nọ baa vbe na ghee orhọnmwẹ vbe orere iso, iran na suẹn gha lelẹe. Nene “orhọnmwẹ” keghi su iran gha rrie Jerusalẹm. Ikpia nii na suẹn gha nọ emwa wẹẹ: ‘De ehe ne ọmọ nọ khian gha re ọba ọghe Ivbi e Ju ye? Te ima rre do ya uhunmwu rhanmwẹ otọ nẹ.’

Vbe Hẹrọd ne ọba ọghe Jerusalẹm ghi họn vbekpa ọba ọgbọn na, osi na gha si ẹre. Ọ na ghi nọ avbe ogiohẹn wẹẹ: ‘De ehe ne avbe akhasẹ wẹẹ a khian na biẹ ọba na?’ Iran keghi tama rẹn wẹẹ: ‘E Bẹtlẹhẹm nọ.’ Ẹre Hẹrọd na ghi tie ikpia ni ke odẹ Ahọ rre, ọ na ba tama iran wẹẹ: ‘Vbe uwa gha gualọ ọmọ na miẹn nẹ vbe Bẹtlẹhẹm, uwa do tama mwẹ ehe nọ ye. I vbe hoo ne I ya uhunmwu rhanmwẹ otọ nẹ.’

Nene “orhọnmwẹ” keghi su ikpia na gha rrie Bẹtlẹhẹm. Vbe “orhọnmwẹ” nii ghi mudia ye uhunmwu owa ọkpa, ikpia nii keghi la owa nii. Iran keghi miẹn Jesu vbe Meri vbe evba. Ẹre iran na ghi ya uhunmwu rhanmwẹ otọ nẹ ọmọmọ nii, iran na ya ọhẹ nẹ; ọhẹ ne iran ya nẹ keghi re igoru, eturari kevbe oziya. E Jehova ẹre ọ gie ikpia na gie Jesu ra? Ẹn o.

Vbe asọn nii, e Jehova keghi tama e Josẹf vbe imina wẹẹ: ‘E Hẹrọd hoo nọ gbe Jesu rua. Uwa lẹẹ gha rrie Igipt. Emwi hia ghaa maan nẹ, uwa sẹtin gha dee.’ Vbe ọwarọkpa nii, e Josẹf keghi viọ ẹgbẹe ọre lẹẹ gha rrie Igipt.

Na kha na, e Jehova tama ikpia nii nẹ, ne iran ghẹ werriegbe bu e Hẹrọd. Vbe Hẹrọd ghi ghee wẹẹ ikpia na ma rre, ohu na gha muẹn. Ugbẹnvbe ọ ma ghi rẹn ehe ne Jesu ye, ọ na ghi wẹẹ na gbele emobọ hia ni ghi re ikpia nẹ vbe Bẹtlẹhẹm rua. Sokpan obọ ma vba Jesu rhunmwuda, a muẹn lẹẹ gha rrie Igipt nẹ ọ kpẹẹ re.

Vbe ọ ma he kpẹẹ vba, Hẹrọd na wu. E Jehova na ghi  tama e Josẹf wẹẹ: ‘Uwa sẹtin werriegbe gha rrie Bẹtlẹhẹm nia.’ Vbe Josẹf, Meri kevbe Jesu ghi werriegbe sẹ otọ Izrẹl, iran na dia e Nazarẹt ya.