Ke eyo nditọ Israel, mbon Edem Usiahautịn ẹkesinịm ke ntantaọfiọn̄ ẹkeme ndida mmimọ usụn̄. Okoneyo usen kiet, irenowo ifan̄ emi ẹtode Edem Usiahautịn ẹma ẹkụt n̄kpọ emi ebietde nyayama ntantaọfiọn̄ nte asan̄ade ke ikpaenyọn̄, mmọ ẹma ẹnyụn̄ ẹtiene ntantaọfiọn̄ oro ekesịm Jerusalem. Mmọ ẹma ẹbụp mme owo do ẹte: ‘Eyen emi edidide edidem mme Jew odu ke m̀mọ̀n̄? Idi ndituak ibuot nnọ enye.’

Ke ini Herod emi akakarade Jerusalem okopde ke obufa edidem amana, esịt ama etịmede enye etieti. Enye ama obụp mbọn̄ oku m̀mê ẹkedọhọ ke edidem emi edimana ke m̀mọ̀n̄. Mmọ ẹma ẹbọrọ ẹte: ‘Mme prọfet ẹkedọhọ ke enye edimana ke Bethlehem.’ Ntre Herod ama okot mbon Edem Usiahautịn oro, onyụn̄ ọdọhọ mmọ ete: ‘Ẹka Bethlehem ẹkeyom eyen oro, ẹma ẹkụt enye, ẹdi ẹditịn̄ ebiet emi enye odude ẹnọ mi man ntiene n̄katuak ibuot nnọ enye.’ Herod okososu!

Ntantaọfiọn̄ oro ama afiak adaha isan̄, mmọ ẹnyụn̄ ẹtiene enye tutu enye akatuak ada ke enyọn̄ ufọk kiet ke Bethlehem. Mmọ ẹma ẹdụk ufọk oro ẹkekụt Jesus ye eka esie, Mary. Mmọ ẹma ẹtuak ibuot ẹnọ eyen oro ẹnyụn̄ ẹnọ enye gold ye frankincense ye myrrh. Ndi Jehovah ọkọdọn̄ mme owo oro ẹka ẹkeyom Jesus? Ihih-o.

Jehovah ama ọdọhọ Joseph ke ndap okoneyo oro ete: ‘Herod oyom ndiwot Jesus. Men eyen oro ye n̄wan fo fehe ka Egypt, nyụn̄ dụn̄ do tutu ndọhọ fi afiak ọnyọn̄ edi.’ Joseph ikabiatke ini, enye ama emen ubon esie efehe aka Egypt.

Jehovah ama ọdọhọ mbon Edem Usiahautịn oro ẹkûfiak ẹka ebịne Herod. Ke ini Herod okụtde ke mmọ ẹbian̄a imọ, esịt ama ayat enye etieti. Sia enye mîkekemeke ndikụt Jesus, enye ama ọnọ uyo ete ẹka Bethlehem ẹkewot kpukpru n̄kpri  nditọ irenowo emi ẹkedide ukem isua emana Jesus. Owo ikowotke Jesus sia ẹma emen enye efehe ẹka Egypt.

Ekem ke Herod ama akakpa, Jehovah ama ọdọhọ Joseph ete: ‘Fiak nyọn̄ Israel.’ Ntre Joseph, Mary, ye Jesus ẹma ẹfiak ẹnyọn̄ Israel ẹkedụn̄ ke Nazareth.