No mli lɛ, maŋ ko ni yɔɔ Israel bokã lɛ mli bii lɛ ateŋ mɛi komɛi heɔ amɛyeɔ akɛ ŋulamii baanyɛ atsɔɔ amɛ gbɛ. Gbɛkɛ ko lɛ, hii komɛi ni jɛ Bokã lɛ na nɔ ko ni tamɔ ŋulami ni miikpɛ waa yɛ ŋwɛi. Amɛkwɛ he ni “ŋulami” lɛ yaa lɛ ni amɛnyiɛ sɛɛ. “Ŋulami” lɛ kɛ amɛ tee Yerusalem. Hii lɛ bi mɛi ni yɔɔ Yerusalem lɛ akɛ: ‘Nɛgbɛ gbekɛ lɛ ni baatsɔ Yudafoi lɛ amaŋtsɛ lɛ yɔɔ? Wɔba ni wɔbakoto lɛ.’

Be ni Herode, ni ji Yerusalem maŋtsɛ lɛ nu akɛ abaaná maŋtsɛ hee lɛ, ehao. Ebi osɔfoi komɛi ni abuɔ amɛ waa lɛ akɛ: ‘Nɛgbɛ akɛɛ abaafɔ maŋtsɛ nɛɛ yɛ?’ Amɛkɛɛ lɛ akɛ: ‘Gbalɔi lɛ kɛɛ abaafɔ lɛ yɛ Betlehem.’ No hewɔ lɛ, Herode tsɛ hii lɛ ni jɛ Bokã lɛ, ni ekɛɛ amɛ akɛ: ‘Nyɛyaa Betlehem nyɛyataoa gbekɛ lɛ. Kɛ́ nyɛna lɛ lɛ, nyɛkua nyɛsɛɛ nyɛbakɛa mi he ni eyɔɔ. Mi hu miitao makoto lɛ.’ Shi asomoaŋ eemale.

Be ni hii lɛ shi Herode shĩa lɛ, “ŋulami” lɛ nyiɛ amɛhiɛ kɛtee Betlehem. Kɛkɛ ni eyadamɔ shĩa ko yiteŋ. No hewɔ lɛ, hii lɛ bote shĩa lɛ mli ni amɛna Yesu kɛ emami Maria. Amɛkoto gbekɛ lɛ, ni amɛke lɛ shika tsuru, ohɛ́ ni jeɔ ŋma, kɛ mire. Shi ani Yehowa ni tsu hii nɛɛ ni amɛyatao Yesu? Dabi.

Nakai gbɛkɛ lɛ, Yehowa kɛɛ Yosef yɛ lamɔ mli akɛ: ‘Herode miitao egbe Yesu. Okɛ oŋa lɛ kɛ obinuu lɛ ajo foi kɛya Ejipt. Nyɛhia jɛmɛ kɛyashi makɛɛ nyɛ akɛ nyɛku nyɛsɛɛ.’ Amrɔ nɔŋŋ lɛ, Yosef kɛ eweku lɛ tee Ejipt.

Yehowa kɛɛ hii lɛ ni jɛ Bokã lɛ akɛ amɛkaya Herode ŋɔɔ dɔŋŋ. Be ni Herode na akɛ hii lɛ baaa dɔŋŋ lɛ, emli fu waa ejaakɛ enaŋ he ni Yesu yɔɔ. No hewɔ lɛ, efã akɛ agbe gbekɛbii hii fɛɛ ni yɔɔ Betlehem ni ená aaafee afii ni Yesu ená lɛ. Shi no mli lɛ, Yesu bɛ Betlehem gbɛ kwraa; eyɛ Ejipt tɔ̃ɔ.

 Sɛɛ mli lɛ, Herode gbo. Yehowa kɛɛ Yosef akɛ: ‘Bianɛ lɛ, nyɛbaanyɛ nyɛku nyɛsɛɛ.’ Yosef, Maria, kɛ Yesu ku amɛsɛɛ kɛtee Israel, ni amɛyahi Nazaret.