Wüinpüjee sünain tü mmakat Israel, nanouja anainrü na wayuukana suʼunirüin nakuwaʼipa tü jolotsükalüirua. Soʼu wanee ai, eejana waneinnua wayuu suluʼujeejana tia mmakat eʼrakana wanee jolotsü chuwatüsü maʼin sümaa unatüin shia. Oʼunushii naya süchiirua tia jolotsükat. Suʼunirüin naya Jerusalénmüin. Nasakiraka: «¿Jalashi chi joʼuu jemeikai aluwataainjachikai saaʼu tü wayuu judíokalüirua? Weeʼiyateein nujut nümüin».

Herodes chi aluwataaikai saaʼu Jerusalén, naapüin süchiki tü münakat nüchiki Jesuu sünain nuluwataainjachin. Shapaasü naaʼin Herodes sutuma tü naapakalü achiki. Nüsakiraka na laülaashiikana napüleerua na sacerdootekana: «¿Jalainjachi jemelin chi aluwataainjachikai?», nümaka. Nasoutaka nümüin: «Naashin na nünüikimaajanakana Maleiwa jemelinjachin nia Belén». Neenajiraka Herodes na wayuu Wüinpüjeʼewaliikana. «Juʼuna Belénmüin, jee jüntapa nünain chi joʼuukai jaapireechi taya süpüla toʼunüin nünainmüin süpüla teeʼiyatüin nujut nümüin», nümaka namüin. Alawaapajaʼa neʼe tia nümakat.

Oʼunusü tü jolotsükat napüleerua, nantaka Belénmüin. Süshaʼwalaaka tü jolotsükat sümamüin maʼin tü piichikat, nekerotoko na wayuukana suluʼu tü miichikat, eejana napüla José, María otta Jesuu. Nayasaʼa na wayuukana, nasapainkashii süpüla neeʼiyatüin nujut nümüin otta nasülajüin nümüin ooro, wanee wunuʼu jemeta eejuut jee wanee wunuʼu kanüliasü mirra. ¿Niache Jeʼwaa oʼuniraka naya nünainmüin Jesuu? Nnojo.

Soʼu aikat tia, aashajaashi Jeʼwaa nümaa José nüʼlapüinruʼu. «Herodes chi aluwataaikai nuʼutee aaʼinchi Jesuu, puʼuna nümaa chi joʼuukai otta sümaa puʼwayuuse Egiptomüin. Makata jia chayaa waneʼereʼeya taküjain jümüin nnojoleechin jamajüin chi joʼuukai», nümaka nümüin. Oʼunamaatüshi José sümaa María otta Jesuu Egiptomüin.

Nümaka Jeʼwaa namüin na wayuu Wüinpüjeʼewaliikana nnojoliinjanain naleʼejüin nachikuaʼa nümaʼanamüin Herodes. Naapapa Herodes sünain naleʼejüin naya wayuukana suluʼupünaa wanee wopu naata, jashichishaatashi maʼin nia jee nuʼutirüin naaʼin napüshuaʼa na joʼuuyuu makana aka saaʼin najaʼapüin Jesuu chaa Belén. Nnojotpajaʼa kasain alatüin nümüin Jesuu süka chajachin nia Egipto.

 Outaka Herodes mapa. «Nnojoluichipa chi wayuu oʼuteepuʼukai naaʼin Jesuu, eeshii süpüla jüleʼejüin jüchikuaʼa», nümaka Jeʼwaa nümüin José. Nuʼunaka José sümaa María otta Jesuu Israelmüin jee makataka naya chaa Nazaret.