Éste gotyo Israélgui umi hénte okree vaʼekue umi estrélla ikatuha ogia chupekuéra. Peteĩ pyhare, unos kuánto kuimbaʼe oikóva éste gotyo ohecha yvágare peteĩ mbaʼe ojoguáva estréllape ha okuʼéva. Haʼekuéra oho pe estrélla ohoha gotyo og̃uahẽ meve Jerusalénpe. Tapére umi kuimbaʼe oporandu umi héntepe: “¿Moõiko oime pe judiokuéra rréi onase vaʼekue? Ore ningo roñesũse henondépe”.

Herodes, pe rréi ogovernáva Jerusalénpe ohendúvo oñeñeʼẽ upe rréi pyahu onasévare, ojepyʼapyeterei ha ohenoika umi saserdótepe ha oporandu chupekuéra moõpa onase vaʼerã pe rréi ojeʼéva outaha. Haʼekuéra heʼi chupe: “Umi profetakuéra ningo heʼi vaʼekue onasetaha Belénpe”. Upémarõ Herodes ohenoika umi kuimbaʼe ou vaʼekuépe ésteguio ha heʼi chupekuéra: “Tapeho Belénpe peheka pe mitãʼi, ha ág̃a petopa vove, peju pemombeʼu chéve ikatu hag̃uáicha che avei aha amombaʼe chupe”. Péro haʼe ijapu hína kuri chupekuéra.

Pe estrélla joguaha oñepyrũ jey okuʼe ha umi kuimbaʼe oho jey upe estrélla ohoha gotyo ha og̃uahẽ hikuái Belénpe. Upépe pe estrélla opyta peteĩ óga ariete pe yvate. Upémarõ umi kuimbaʼe oike upe ógape ha otopa hikuái Jesúspe isýndi. Haʼekuéra oñesũ pe mitã renondépe ha omeʼẽ chupe heta rregálo. Omeʼẽ chupe óro, insiénso ha mírra. ¿Péro añetehápepa Jehová la ogia vaʼekue umi kuimbaʼépe oho hag̃ua Jesús oĩhápe? Nahániri.

Upe pyharépe Jehová heʼi Josépe isuéñope: “Herodes ojukase hína Jesúspe. Epuʼã ejagarra pe mitã ha isýpe ha tapeho pekañy Egíptope. Pepyta upépe poavisa peve ohasamaha la pelígro”. Ensegída voi José oraha María ha Jesúspe ha oho Egíptope.

Jehová oñeʼẽ kuri avei iképe umi kuimbaʼe oúvape ésteguio ha heʼi chupekuéra ani hag̃ua oho jey Herodes rendápe. Herodes ipochyeterei opillávo umi kuimbaʼe ndoumoʼãveimaha hendápe. Haʼe ndaikatúimarõ otopa Jesúspe, omanda ojejukapaite hag̃ua entéro mitãkuimbaʼe oĩvape Belénpe ha orekóva Jesús eda. Péro upérõ Jesús oĩma Egíptope, upévare ndojejukái chupe.

 Upéi Herodes omano rire Jehová heʼi Josépe: “Ikatúma peho jey. Ndaiporivéima pelígro”. José oraha jey María ha Jesúspe Israélpe ha opyta oiko hikuái Nazarétpe.