Mẹdelẹ nọ nọ̀ whèzẹtẹn-waji Islaeli tọn bo yise dọ sunwhlẹvu lẹ gán nọ deanana yé. To zánmẹ gbèdopo, omẹ Whèzẹtẹn-waji lọ tọn delẹ mọdọ nuhe to sisẹ́ taidi sunwhlẹvu de to tẹnsẹ to agahomẹ, bọ yé hodo e. “Sunwhlẹvu” lọ plan yé yì Jelusalẹm. Yé jẹ kinkanse mẹlẹ ji dọ: ‘Fie wẹ ovi he na wá yin ahọlu Ju lẹ tọn lọ te? Mí wá nado litaina ẹn wẹ.’

Whenue Hẹlọdi, ahọlu Jelusalẹm tọn sèhó gando ahọlu yọyọ de go, e jẹ nuhà ji. E kanse yẹwhenọgán lẹ dọmọ: ‘Fie wẹ ahọlu lọ dona yin jiji te?’ Yé gblọnna ẹn dọmọ: ‘Yẹwhegán lẹ dọ dọ Bẹtlẹhẹm wẹ e na yin jiji te.’ Enẹwutu, Hẹlọdi ylọ mẹhe wá sọn Whèzẹtẹn-waji lọ lẹ bo dọna yé dọ: ‘Mì yì Bẹtlẹhẹm bo dín ovi ehe mọ. Eyin mì mọ ẹn, mì lẹkọwa dọ fie e te na mi. Yẹnlọsu jlo na litaina ẹn.’ Amọ́, lalodo wẹ e te.

“Sunwhlẹvu” lọ jẹ tẹnsẹ ji whladopo dogọ. Sunnu lọ lẹ sọ hodo e yì Bẹtlẹhẹm. “Sunwhlẹvu” lọ wá nọte to aga owhé de tọn bọ yé biọ owhé lọ gbè. Yé mọ Jesu po onọ̀ etọn Malia po. Yé sọ dẹ́ do odò na ovi lọ bo na ẹn sika, nuyọnwan gblingblin po zuya po. Be Jehovah wẹ do sunnu enẹlẹ hlan nugbonugbo nado dín Jesu mọ ya? Lala.

To ozán enẹ mẹ, Jehovah dọna Josẹfu to odlọ mẹ dọmọ: ‘Hẹlọdi jlo na hù Jesu. Plan asi towe po visunnu lọ po bo họnyi Egipti. Nọ finẹ kakajẹ whenue n’na dọna we dọ a gán lẹkọ.’ To afọdopolọji, Josẹfu po whẹndo etọn po dedo Egipti.

Jehovah ko dọna mẹhe wá sọn Whèzẹtẹn-waji lọ lẹ dọ yé ma dona lẹkọyi Hẹlọdi dè. To whenue Hẹlọdi wá doayi e go dọ yé ma lẹkọwa ba, e biọ adi mẹ. Na e ma yọ́n fie Jesu te taun wutu, e degbe dọ yọpọ sunnu he tindo owhe Jesu tọn nkọ to Bẹtlẹhẹm lẹpo ni yin hùhù. Amọ́, Jesu ko dẹn do finẹ bo to hihọ́ glọ to Egipti.

 To nukọn mẹ, Hẹlọdi kú. Jehovah sọ dọna Josẹfu dọ: ‘Ninọmẹ lọ ko pọnte din bọ a gán lẹkọyi whé.’ Josẹfu, Malia po Jesu po sọ lẹkọyi Islaeli bo sawhé do tòdaho Nazalẹti tọn mẹ.