Sa sidlangan halin sa Israel, ang mga tawo didto nagapati nga ang mga bituon nagagiya sa ila. Isa ka gab-i, nakita sang mga lalaki halin sa Sidlangan ang daw masanag nga bituon nga nagahulag sa langit, gani ginsunod nila ini. Gingiyahan sila sang “bituon” pakadto sa Jerusalem. Namangkot sila sa mga tawo: ‘Diin ang bata nga mangin hari sang mga Judiyo? Nagkadto kami diri para magyaub sa iya.’

Sang nabatian ni Herodes, nga hari sang Jerusalem, ang parte sa bag-o nga hari, naglalain gid sia. Ginpamangkot niya ang puno nga mga saserdote: ‘Sa diin matawo ini nga hari?’ Ginsugiran nila sia: ‘Ang mga manalagna nagsiling nga matawo sia sa Betlehem.’ Gani ginpatawag ni Herodes ang mga lalaki halin sa Sidlangan kag nagsiling: ‘Lakat kamo sa Betlehem kag pangitaa ninyo ini nga bata. Balik kamo sa akon kag pahibalua ninyo ako kon diin sia. Gusto ko man magyaub sa iya.’ Pero indi ina matuod.

Naghulag liwat ang “bituon.” Ginsunod ini sang mga lalaki pakadto sa Betlehem. Nagdulog ang “bituon” sa ibabaw sang isa ka balay kag nagsulod ang mga lalaki. Nakita nila si Jesus upod sa iya iloy nga si Maria. Nagyaub sila sa bata kag naghatag sing mga regalo nga bulawan, olibano, kag mira. Ginpadala bala ni Jehova ini nga mga lalaki para makita si Jesus? Wala.

Sina nga gab-i, ginsilingan ni Jehova si Jose paagi sa damgo: ‘Gusto ni Herodes nga patyon si Jesus. Dal-a ang imo asawa kag bata kag magpalagyo kamo sa Egipto. Didto lang kamo anay asta nga indi na delikado magbalik.’ Nagkadto dayon si Jose kag ang iya pamilya sa Egipto.

Ginsilingan ni Jehova ang mga lalaki halin sa Sidlangan nga indi na magbalik kay Herodes. Sang nahibaluan ini ni Herodes, naakig gid sia. Bangod indi niya makita si Jesus, nagsugo sia nga pamatyon ang tanan nga bata nga lalaki sa Betlehem nga pareho ang edad kay Jesus. Pero indi na niya mapatay si Jesus, kay sa Egipto na sila.

 Sang ulihi, napatay si Herodes. Si Jehova nagsiling kay Jose: ‘Indi na delikado nga magbalik kamo.’ Si Jose, si Maria, kag si Jesus nagbalik sa Israel, kag nag-istar sila sa siudad sang Nazaret.