Mehi rokomuhuka kwaIsrael mwa turire ovandu mbaave kambura kutja osonyose maze yenene okuvehongorera. Ouṱuku umwe, ovarumendu tjiva mba zire kOmuhuka va munine otjiṋa tjaatji munika tjimuna onyose yondjerera nomasa ndjaai ryanga meyuru, nu owo vei kongorera. “Onyose” ye ve twara koJerusalem. Ovarumendu mba va uta okupura ovandu nave tja: ‘Okanatje ke ri pi ku ma kerire ombara yOvajuda? Eṱe twe yekurikotamena ku ko.’

Indu Herodes, ombara yaJerusalem, tja zuva ohunga nombara ombe, eye we rikenda tjinene. Eye wa pura komupristeri otjiuru na tja: ‘Ombara mai sokukwaterwa pi?’ Owo va tja ku ye: ‘Ovaprofete va tja ma kwaterwa moBetlehem.’ Herodes wa isana ovarumendu mba zire kOmuhuka na tja ku wo: ‘Twendeye koBetlehem mu kapahe nawa okanatje. Okuzambo mu kotoke mu yekundjiraera kutja ke ri pi. Ami wina me vanga okukerikotamena ku ko.’ Posiya eye kaa hungire ouatjiri.

“Onyose” ya uta okukayenda rukwao. Ovarumendu mba ve i kongorera nga koBetlehem. “Onyose” ndji ya kakurama kombanda yondjuwo novarumendu va hita moukoto wondjuwo. Owo va kamuna Jesus puna ina, Maria. Owo ve rikotamena kokanatje nave yandja oviyandjewa vyongoldo, novyomoro omuwa nemira. Hapo tjiri Jehova ongwa hinda ovarumendu mba okuyekutara Jesus? Kako.

Ouṱuku mbo, Jehova wa raera Josef moruroto na tja: ‘Herodes ma vanga okuzepa Jesus. Toora omukazendu woye nokazandona mu yende koEngipte. Kakareye ngo nga ami tji mbe mu raere kutja ku ri nawa okukotoka.’ Tjimanga Josef neṱunḓu re va ya koEngipte.

Jehova wa raera ovarumendu mba za kOmuhuka kutja ave yaruka ku Herodes. Indu Herodes tja muna kutja ovarumendu mbo kave nokukotoka ku ye, eye wa pindika tjinene. Mena rokutja Herodes kaa yenene okumuna Jesus, eye wa rakiza kutja ounatje auhe ouzandu moBetlehem omakura waJesus u zepewe. Posiya Jesus kena pa zepewa, orondu wa ri kokure koEngipte.

 Kombunda Herodes wa ṱa. Jehova wa raera Josef na tja: ‘Nambano yarukeye, orondu imba mbaave vanga okuzepa okanatje nambano va ṱa.’ Josef, Maria na Jesus va yaruka koIsrael nave katura motjihuro tjaNasaret.