Iti maysa a lugar iti daya ti Israel, patien dagiti tattao a maidalan ida dagiti bituen. Maysa a rabii, adda lallaki a naggapu iti Daya a nakakita iti kasla nalawag a bituen nga umak-akar. Sinurotda dayta ket nakadanonda idiay Jerusalem. Insaludsodda kadagiti tattao: ‘Ayan ti ubing nga agbalinto nga ari dagiti Judio? Immaykami tapno agruknoy kenkuana.’

Idi naammuan ti ari ti Jerusalem a ni Herodes ti maipapan iti baro nga ari, nagdanag unay. Insaludsodna kadagiti panguluen a papadi: ‘Sadino ti pakayanakan daytoy nga ari?’ Insungbatda: ‘Imbaga dagiti propeta a mayanak idiay Betlehem.’ Isu a pinaayaban ni Herodes dagiti lallaki a naggapu iti Daya ket imbagana: ‘Mapankayo idiay Betlehem ket birokenyo ti ubing. Agsublikayto kaniak ket ibagayo ti ayanna. Kayatko met ti agruknoy kenkuana.’ Ngem agul-ulbod ni Herodes.

Immakar manen ti “bituen.” Sinurot dayta dagiti lallaki ket nakadanonda idiay Betlehem. Nagsardeng ti “bituen” iti ngato ti maysa a balay ket simrek dagiti lallaki. Nakitada ni Jesus ken ni Maria a nanangna. Nagruknoyda iti ubing sa rinegaluanda kadagiti balitok, olibano, ken mirra. Talaga kadi nga imbaon ni Jehova dagitoy a lallaki a mangbirok ken Jesus? Saan.

Iti dayta a rabii, imbaga ni Jehova ken Jose iti tagtagainep: ‘Kayat a patayen ni Herodes ni Jesus. Mapankayo idiay Egipto. Agyankayo sadiay agingga nga ibagak a mabalinyon ti agsubli.’ Dagus a napan ni Jose ken ti pamiliana idiay Egipto.

Imbaga ni Jehova kadagiti lallaki a naggapu iti Daya a didan agsubsubli ken Herodes. Idi saandan a nagsubli, permi ti unget ni Herodes. Gapu ta dina mabirokan ni Jesus, impapatayna amin nga ubing a lalaki a katawenan ni Jesus iti Betlehem. Ngem saanna a maan-ano ni Jesus ta addan idiay Egipto nga adayo iti Jerusalem.

 Idi agangay, natay ni Herodes. Imbaga ni Jehova ken Jose: ‘Mabalinyon ti agsubli, awanen ti mayat a mangpatay iti ubing.’ Nagsubli da Jose, Maria, ken Jesus idiay Israel, ket nagyanda iti siudad ti Nazaret.