Evaọ ofẹ ovatha-ọre ẹkwotọ Izrẹl, ahwo jọ a jariẹ nọ a rọwo nọ isi e rẹ sae kpọ ohwo. Evaọ Aso ẹdẹjọ, ezae jọ nọ i no obọ ovatha-ọre ze, a tẹ ruẹ esi jọ nọ o bi lo nwranwranwra nọ ọ be nya evaọ ehru na, a te mu esi na họ elele. “Esi” na o te su ai kpobọ Jerusalẹm. Ezae na a te mu ahwo họ ẹnọ inọ: ‘Diẹse ọmọ nọ ọ te jọ ovie ahwo Ju na ọ rrọ? Ma nyaze re ma guzou kpotọ kẹe.’

Nọ Herọd ovie Jerusalẹm o yo kpahe ovie ọkpokpọ nana nọ a yẹ na, ozọ u te mu ei gaga. Ọ tẹ nọ izerẹ ikpehru na nọ: ‘Diẹse a ti jo yẹ ọmọ nọ ọ te jọ ovie na?’ A tẹ ta kẹe nọ: ‘Eruẹaro na a ta nọ a ti yẹi evaọ Bẹtlẹhẹm.’ Fikiere Herọd o te se ezae nọ i no obọ ovatha-ọre ze na, ọ tẹ ta kẹ ae nọ: ‘Wha kpobọ Bẹtlẹhẹm nyae gwọlọ oria nọ ọmọ na ọ rrọ. Nọ wha tẹ ruẹ ọmọ na no, wha zihe ze te vuẹ omẹ oria nọ ọ rrọ. Mẹ gwọlọ nyai guzou kpotọ kẹe re.’ Rekọ ọrue o bi gu na.

“Esi” na ọ tẹ wariẹ muhọ ẹnya. Ezae na a te lele “esi” na kpobọ Bẹtlẹhẹm. Nọ “esi” na ọ nyate uwou jọ, ọ tẹ daji, ezae na a tẹ ruọ evaọ uwou na. A tẹ ruẹ Meri avọ ọmọ riẹ Jesu. A te guzou kpotọ kẹ ọmọ na jẹ kẹe ekẹ igoru, frankinsẹse gbe mọr. Kọ Jihova o gine vi ezae nana nyae gwọlọ Jesu na? Ijo.

Evaọ aso ọyena, Jihova ọ tẹ jọ ewezẹ ta kẹ Josẹf nọ: ‘Herọd ọ gwọlọ kpe Jesu. Rehọ aye ra gbe ọmọ na re wha dhẹ kpobọ Ijipti. Wha jọ obei bẹsenọ mẹ rẹ vuẹ owhẹ nọ wha zihe ze.’ O raha oke he, Josẹf ọ tẹ kwa uviuwou riẹ kpobọ Ijipti.

Jihova ọ ta kẹ ezae nọ i no obọ ovatha-ọre na ze nọ a zihe bru Herọd ho. Nọ Herọd ọ te riẹ nọ ezae na a kpo no, eva e tẹ dhae gaga. Fikinọ ọ riẹ oria nọ Jesu ọ rrọ evaọ Bẹtlẹhẹm ho, o te juzi nọ a kpe emezae kpobi nọ e rrọ unuikpe Jesu evaọ Bẹtlẹhẹm soso no. Rekọ evaọ oke yena, yọ Josẹf avọ Meri a wọ Jesu dhẹ kpobọ Ijipti no.

 Nọ oke jọ o vrẹ no, Herọd o te ti whu. Jihova ọ tẹ ta kẹ Josẹf nọ: ‘Enẹna wha sai zihe kpo.’ Josẹf avọ Meri gbe Jesu a te zihe kpobọ Izrẹl, a te wo họ ẹwho Nazarẹt.