Andũ amwe mekalaa nthĩ yaĩ ngalĩko ya wumĩlonĩ wa syũa wa Isilaeli maĩkĩĩaa kana ndata no itonye kũmatongoesya kũthi vala mekwenda. Ũtukũ ũmwe aũme amwe katĩ wa asu nĩmoonie ndata yatisaa mũno yayayanĩ na ĩndĩ mamĩatĩĩa. “Ndata” ĩsu yamatongoesye nginya Yelusaleme. Mavika ndũanĩ ĩsu mambĩĩe kũkũlya andũ atĩĩ: ‘Kaĩva kana kala kasyaiwe keĩthĩwa mũsumbĩ wa Ayuti? Nĩtwooka kũkakumanĩa.’

Yĩla Elote, ũla waĩ mũsumbĩ wa Yelusaleme weewie kana ve mũsumbĩ mweũ, nĩwambĩĩe kũthĩnĩka mũno. Nĩvo ĩndĩ wakũlilye athembi anene: ‘Mũsumbĩ ũsu mweũ aĩle kũsyaĩwa ndũanĩ yĩva?’ Namo mamũsũngĩa mamwĩa: ‘Athani maisye kana aĩle kũsyaĩwa Mbetheleemu.’ Yĩla Elote wataviwʼe ũu, nĩweetie aũme asu maumĩte ngalĩko ya wumĩlonĩ wa syũa na amea: ‘Endai Mbetheleemu na mũimantha kana kau. Mwakona syokai mũndavye vala kaĩ. O nakwa nĩngwenda kũkakumanĩa.’ Ĩndĩ Elote eekaa kũkenga andũ asu.

Yĩla andũ asu maumaalile mathi, ĩla “ndata” nĩyambĩĩie kũthi ĩngĩ. Na ĩndĩ aũme asu mamĩatĩĩa nginya Mbetheleemu. “Ndata” ĩsu yookie kũũngama ĩũlũ wa nyũmba na aũme asu malika nthĩnĩ. Malika meethĩie Yesũ na inyia wake, Meli. Na ĩndĩ mamũkumanĩa Yesũ na mamũnenga mĩthĩnzĩo ya thaavu, ũvumba na manemane. Kwa wʼo, Yeova nĩwatũmĩte aũme asu makamanthe Yesũ? Aiee.

Ũtukũ ũsu Yeova nĩwamumĩlĩĩle Yosevu ndotonĩ na amwĩa: ‘Elote nũkwenda kũmũaa Yesũ. Osa kĩveti kyaku na mwana waku na mũisemba mũthi Misili. Ĩkalai kũu mũvaka yĩla nĩmũtavya kana yu nĩ kũseo no mũsyoke.’ Vau kwa vau, Yosevu na andũ make nĩmaendie Misili.

Yeova nĩwatavĩtye aũme kuma wumĩlonĩ wa syũa kana maikasyoke kwa Elote. Yĩla Elote wamanyie kana aũme asu maikũsyoka nĩwathatie mũno. Na nũndũ nĩwamanyie kana ndemwona Yesũ, nĩwaumisye mwĩao  tũmwana twʼonthe twa ĩika ya Yesũ ndũanĩ ya Mbetheleemu tũawe. Ĩndĩ Yesũ ndaĩ esa kũawa nũndũ aĩ nthĩ ya Misili.

Ĩtina wa ĩvinda Elote nĩwakwie. Na ĩndĩ Yeova amwĩa Yosevu: ‘Yu nĩ kũseo, no mũsyoke kwenyu Isilaeli.’ Yosevu, Meli, na Yesũ nĩmasyokie Isilaeli, na mekala ndũanĩ ya Nasaleti.