KPƐLƖKƲƲ 71
Yehowa kandɩyɩ Yesu yɔɔ
Tɛtʋ natʋyʋ kaawɛ Izrayɛɛlɩ ɛjaɖɛ cɔlɔ nɛ wɩsɩ ɖɩlɩyɛ taa kiŋ, nɛ tɩ-taa ɛyaa maɣzaɣ se tɩɩnzɩ pɩzɩɣ nɛ siɖiyi-wɛ. Ðoo naayɛ taa, pana nabʋyʋ wɛɛ pɩñɩlɩsɩɣ ɛsɔdaa ɛzɩ tɩɩŋa ŋga kɛwɛɛ kɔɖɔŋ yɔ nɛ patɩŋ ka-wayɩ nɛ kowoni-wɛ Yeruzalɛm. Wɩsɩ ɖɩlɩyɛ taa ɛyaa mba, patalɩ Yeruzalɛm lɛ, papaɣzɩ ɛyaa pɔzʋʋ se: ‘Le pɩɣa ŋga kakaɣ kɛʋ Yuuda ñɩma wiyaʋ yɔ, kɛwɛɛ? Ðɩkɔm se ɖɩsɛɛ-kɛ.’
Yeruzalɛm wiyaʋ Eroodi nɩ wiyaʋ kɩfalʋ tɔm lɛ, sɔɔndʋ paɣzɩ-ɩ kpaʋ. Ɛpɔzɩ cɔjɔnaa se: ‘Le pakaɣ wiyaʋ ɛnʋ lʋlʋʋ?’ Pocosi-i se: ‘Nayaa tɔm se pakaɣ-ɩ lʋlʋʋ Bɛtɩlɛhɛm.’ Eroodi nɩ mbʋ lɛ, eheyi wɩsɩ ɖɩlɩyɛ taa abalaa mba se: ‘Iwolo Bɛtɩlɛhɛm nɛ ɩñɩnɩ pɩɣa ŋga. Ɩna-kɛ lɛ, ɩpɩsɩ nɛ ɩkɔɔ iheyi-m ɖenɖe kɛwɛɛ yɔ. Ma ɖɔɖɔ mɔnsɔɔlaa se mowolo nɛ mɛnsɛɛ-kɛ.’ Ɛlɛ Eroodi kaawɛɛ nɛ ɛcɛtɩɣ kɩcɛtʋʋ.
Tɩɩŋa ŋga, kaɖaɣnɩ paɣzʋʋ ɖɔm nɛ abalaa mba patɩŋ ka-wayɩ nɛ patalɩ Bɛtɩlɛhɛm. Patalɩ peeɖe lɛ, tɩɩŋa ŋga kasɩŋ ɖɩɣa nakɛyɛ ñʋʋ taa nɛ abalaa mba, pɛɖɛɛ pasʋʋ ɖɩɣa ŋga ka-taa. Pana Yesu nɛ e-ɖoo Maarɩɩ. Poluŋ nɛ pɛsɛɛ Yesu nɛ paha-ɩ sika, sɔzɩŋ pɛɛ nɛ num mbʋ pɩmʋ liidiye pɩdɩɩfɛyɩ yɔ. Ɛlɛ Yehowa tiyini abalaa panɛ se powolo Yesu cɔlɔ? Aayɩ!
Ðoo ana a-taa Yehowa heyi Yosɛɛfʋ ɖoziye taa se: ‘Eroodi ñɩnɩɣ se ɛkʋ Yesu. Kpaɣ ña-halʋ nɛ ña-pɩɣa nɛ ise ɩɖɛɛ Ejipiti. Ɩcaɣ peeɖe pɩkɔɔ pɩsɩɩnɩ alɩwaatʋ ndʋ meheyiɣ-mɩ se ɩpɩsɩ yɔ.’ Kpaagbaa mbʋ lɛ, Yosɛɛfʋ kpaɣ ɛ-hɔʋ nɛ pɛɖɛɛ Ejipiti.
Yehowa heyi abalaa mba se pataapɩsɩ Eroodi cɔlɔ. Eroodi nawa se abalaa mba, paapɩsɩɣ ɛ-cɔlɔ lɛ, ɛ-taa paɣzɩ wɩʋ. Ɛnɩ pɩ-taa se ɛɛpɩzɩɣ nɛ ɛna Yesu lɛ, ɛɖʋ paɣtʋ se pakʋ abalɩbiya nzɩ sɩwɛnɩ Yesu pɩnzɩ yɔ sɩ-tɩŋa Bɛtɩlɛhɛm tɛtʋ taa. Ɛlɛ Yesu ñɛtɛm wɛʋ ɖooo Ejipiti.
Eroodi sɩba lɛ, Yehowa heyi Yosɛɛfʋ se: ‘Lɛɛlɛɛyɔ, ɩpɩzɩɣ ɩpɩsɩ.’ Yosɛɛfʋ, Maarɩɩ nɛ Yesu papɩsɩ powolo Izrayɛɛlɩ nɛ pacaɣ Nazarɛɛtɩ tɛtʋ taa.
“Mɔn-tɔm . . . ndʋ tɩlɩnɩ mɔ-nɔɔ taa yɔ . . . tɩkaɣ pɩzʋʋ nɛ tɩla mbʋ mentiyi-tʋ se tɩla yɔ.”—Izaayii 55:11