Kiwank jun li naʼaj saʼ relebʼl saqʼe xweent Israel bʼarwiʼ ebʼ li poyanam nekeʼxkʼoxla naq ebʼ li chahim naxkʼut xbʼehebʼ. Saʼ jun qʼoqyink, wiibʼ oxibʼ li winq aj relebʼl saqʼe keʼril chanchan jun li lemtzʼil chahim yook chi ekʼank saʼ choxa, ut keʼxtaqe. Li «chahim» kikʼamok rehebʼ toj Jerusalen. Ebʼ li winq yookebʼ xpatzʼbʼal rehebʼ li poyanam: «Bʼar wank li chʼinaʼal li tkanaaq choʼq awabʼej saʼ xbʼeenebʼ laj Judiiy? Naqaj xwiqʼibʼankil qibʼ chiru».

Laj Herodes, li awabʼej re Jerusalen, kirabʼi resil li akʼ awabʼej. Jwal kiʼok xkʼaʼuxl ut kixpatzʼ rehebʼ li xbʼeenil aj tij: «Bʼar peʼ xeʼxye naq tyoʼlaaq li awabʼej aʼin?». Ut keʼxsume: «Ebʼ li propeet keʼxye naq Belen». Joʼkan naq, laj Herodes kixye rehebʼ li winq aj relebʼl saqʼe: «Ayuqex Belen ut sikʼomaq chaq li chʼinaʼal. Tojaʼ naq, texchalq ut toleeye we, laaʼin nawaj ajwiʼ xwiqʼibʼankil wibʼ chiru». Abʼan tikʼtiʼ.

Li «chahim» kiʼok wiʼ chik chi ekʼank, ut ebʼ li winq keʼok xtaqenkil toj Belen. Tojaʼ naq li «chahim» kixaqliik saʼ xbʼeen jun li ochoch, ebʼ li winq keʼok ut keʼxtaw li Jesus rochbʼen li xMaria, li xnaʼ. Ebʼ li winq keʼxwiqʼibʼ ribʼ chiru li chʼinaʼal ut keʼxkʼe xmaatan: oor, insiʼeens ut miir. Abʼan, ma yaal naq li Jehobʼa kixtaqlahebʼ li winq aʼin rikʼin li Jesus? Inkʼaʼ.

Saʼ li qʼoqyink ajwiʼ aʼin, li Jehobʼa kixye re laj Jose saʼ jun li matkʼ: «Laj Herodes traj xkamsinkil li Jesus. Kʼam laawixaqil ut laawalal, ut ayuqex Egipto. Kanaqex aran ut mexsutqʼiik chaq toj naq tinye eere naq ak xnumeʼk li chʼaʼajkilal». Joʼkan naq, laj Jose ut li xjunkabʼal xkohebʼ saʼ junpaat Egipto.

Joʼkan ajwiʼ, li Jehobʼa kixye rehebʼ li winq aj relebʼl saqʼe naq inkʼaʼ teʼsutqʼiiq rikʼin laj Herodes. Naq laj Herodes kixkʼe reetal naq inkʼaʼ chik teʼsutqʼiiq, kʼajoʼ naq kichalk xjosqʼil. Saʼ xkʼabʼaʼ naq inkʼaʼ kixtaw li  Jesus, kixtaqla xkamsinkil ebʼ li chʼinaʼal li wankebʼ saʼ xchihabʼ li Jesus. Abʼan li Jesus maakʼaʼ kixkʼul xbʼaan naq wank chaq Egipto.

Xeʼnumeʼk li po, ut laj Herodes kikamk. Tojaʼ naq li Jehobʼa kixye re laj Jose: «Maakʼaʼ chik chʼaʼajkilal. Naru texsutqʼiiq». Laj Jose, li xMaria ut li Jesus keʼsutqʼiik Israel ut keʼkanaak Nazaret.