Bũrũri-inĩ ũmwe warĩ mwena wa irathĩro wa Isiraeli nĩ kwarĩ andũ metĩkĩtie atĩ njata no imonie njĩra. Ũtukũ ũmwe, andũ amwe kuuma mwena wa Irathĩro nĩ monire kĩndũ kĩahaanaga ta njata yarĩ na ũtheri mũingĩ gĩgĩthiĩ matu-inĩ na magĩkĩrũmĩrĩra. “Njata” ĩyo yamatongoririe nginya Jerusalemu. Makinya maambĩrĩirie kũũria andũ ũũ: ‘Arĩ kũ mwana ũrĩa ũgatuĩka mũthamaki wa Ayahudi? Tuoka kũmũinamĩrĩra.’

Rĩrĩa Herode, Mũthamaki wa Jerusalemu, aaiguire atĩ kũrĩ na mũthamaki ũngĩ, nĩ aamakire mũno. Oririe athĩnjĩri-Ngai arĩa anene ũũ: ‘Mũthamaki ũcio aagĩrĩirũo aciarĩrũo kũ?’ Nao makĩmwĩra ũũ: ‘Anabii moigire atĩ angĩacirĩirũo Bethilehemu.’ Nĩ ũndũ ũcio, Herode agĩta andũ acio moimĩte Irathĩro akĩmeera ũũ: ‘Thiĩi Bethilehemu mũtuĩrie ũhoro wa mwana ũcio. Na mwamuona mũgooka mũnjĩre kũrĩa arĩ. O na niĩ nĩ ndĩrenda kũmũinamĩrĩra.’ No macio maarĩ maheeni matheri.

“Njata” ĩyo nĩ yaambĩrĩirie gũthiĩ rĩngĩ na andũ acio makĩmiuma thutha nginya Bethilehemu. “Njata” ĩyo yathire ĩkĩrũgama igũrũ rĩa nyũmba ĩmwe, nao andũ acio makĩingĩra kuo thĩinĩ. Maakorire Mariamu anyitĩte Jesu. Mainamĩrĩire mwana ũcio na makĩmũhe thahabu, ũbani, na manemane irĩ iheo. Hihi Jehova nĩwe watũmĩte andũ acio mathiĩ magacarie Jesu? Aca.

Ũtukũ ũcio Jehova nĩ eerire Jusufu ũũ kĩroto-inĩ: ‘Herode arenda kũũraga Jesu. Oya mũtumia waku na mwana mũũrĩre Misiri, na mũikare kuo nginya rĩrĩa ngakwĩra ũcoke.’ Jusufu na famĩlĩ yake nĩ maathire Misiri o hĩndĩ ĩyo.

Jehova nĩ eerĩte andũ arĩa moimĩte Irathĩro matigacoke kũrĩ Herode. Rĩrĩa Herode onire atĩ matinacoka kũrĩ we, nĩ aarakarire mũno. Tondũ rĩu ndangĩahotire kuona Jesu, oigire atĩ tũhĩĩ tũrĩa  tuothe twarĩ twa rika rĩa Jesu tũũragwo Bethilehemu guothe. No Jesu ndaarĩ ũgwati-inĩ tondũ aarĩ Misiri.

Thutha wa ihinda Herode nĩ aakuire. Jehova eerire Jusufu ũũ: ‘Rĩu gũtirĩ na ũgwati no ũcoke bũrũri wanyu.’ Jusufu, Mariamu, o hamwe na Jesu nĩ maacokire Isiraeli na magĩthiĩ gũikaraga itũũra-inĩ rĩa Nazarethi.