Na di Ist, sɔm pipul dɛn bin de we biliv se di sta de gayd dɛn. Wan nɛt, sɔm man dɛn we kɔmɔt na di Ist bin si sɔntin we tan lɛk brayt sta de muv na di skay, ɛn dɛn fala am. Di “sta” kɛr dɛn go na Jerusɛlɛm. Di man dɛn bigin fɔ aks pipul dɛn se: ‘We di pikin we gɛt fɔ bi kiŋ fɔ di Ju dɛn? Wi dɔn kam fɔ butu bifo am.’

We Ɛrɔd, we na bin di kiŋ na Jerusɛlɛm, yɛri bɔt di nyu kiŋ, i bin rili wɔri. I aks di edman dɛn fɔ di prist dɛn se: ‘Usay dɛn go bɔn dis nyu kiŋ?’ Dɛn tɛl am se: ‘Di prɔfɛt dɛn se dɛn go bɔn am na Bɛtliɛm.’ So Ɛrɔd kɔl di man dɛn we kɔmɔt na di Ist ɛn tɛl dɛn se: ‘Una go na Bɛtliɛm ɛn fɛn dis pikin. Una kam tɛl mi usay una si am. Misɛf want fɔ butu bifo am.’ Bɔt na lay i bin de lay.

Di “sta” bigin fɔ muv bak. Di man dɛn fala am te dɛn go na Bɛtliɛm. Di “sta” stɔp pantap wan os ɛn di man dɛn bin go insay de. Dɛn si Jizɔs wit in mama, Meri. Dɛn butu bifo di pikin ɛn dɛn gi am gift dɛn we na gold, frankinsɛns, ɛn ma. Yu tink se na Jiova sɛn dɛn man dɛn ya fɔ kam fɛn Jizɔs? Nɔ.

Da nɛt de, Jiova bin tɛl Josɛf na in drim se: ‘Ɛrɔd want fɔ kil Jizɔs. Tek yu wɛf ɛn bɔypikin ɛn rɔn go na Ijipt. Una de de te a tɛl una se i sef fɔ mek una tɔn bak.’ Wantɛm wantɛm, Josɛf ɛn in famili go na Ijipt.

Jiova tɛl di man dɛn we kɔmɔt na di Ist se dɛn nɔ fɔ go bak to Ɛrɔd. We Ɛrɔd kam fɔ no se dɛn nɔ gɛt fɔ kam bak, dat mek i rili vɛks. Bikɔs i nɔ bin ebul fɔ fɛn Jizɔs, i pas lɔ se dɛn fɔ kil ɔl di bɔypikin dɛn we bin de na Bɛtliɛm we gɛt di sem ej wit Jizɔs. Bɔt Jizɔs bin sef bikɔs i bin de na Ijipt.

 Afta sɔm tɛm, Ɛrɔd day. Jiova tɛl Josɛf se: ‘I sef naw fɔ mek una go bak.’ Josɛf, Meri, ɛn Jizɔs go bak na Izrɛl, ɛn dɛn go de na Nazarɛt.