တၢ်မၤလိ ၇၁
ယဟိဝၤယွၤဒီသဒၢဝဲယ့ၣ်ၡူး
ပှၤအိၣ်လၢထံကီၢ်လၢအအိၣ်လၢ ကီၢ်အံၣ်စရ့လးအမုၢ်ထီၣ်တခီန့ၣ် နာ်ဝဲလၢဆၣ်တဖၣ်န့ၣ် ဟံးစုနဲၣ်ကျဲအဝဲသ့ၣ်လီၤ. ဘၣ်တနၤန့ၣ် ပှၤတနီၤလၢအိၣ်လၢ မုၢ်ထီၣ်တခီထံၣ်ဘၣ်ဝဲ တၢ်တမံၤလၢ အကပီၤ ဒ်သိးဒီးဆၣ်တဖျၢၣ်အိၣ်ဖျါထီၣ်ဝဲလၢတၢ်ဖးဖီလီၤ. ဒီးခီဖျိလၢ “ဆၣ်” တဖျၢၣ်သုးအသးလၢ တၢ်ဖးဖီအဃိ အဝဲသ့ၣ်လဲၤပိာ်အခံလီၤ. “ဆၣ်” တဖျၢၣ်အံၤ ဆှၢအဝဲသ့ၣ် ဆူဝ့ၢ်ယရူၤၡလ့ၣ်အပူၤလီၤ. ဒီးအဝဲသ့ၣ်သံကွၢ်ဝဲ ပှၤအဂၤတဖၣ်လၢ– ‘ပှၤလၢအကကဲထီၣ် ပှၤယူဒၤဖိအစီၤပၤန့ၣ် မ့ၢ်အအိၣ်ဖဲလဲၣ်. ပဟဲဒ်သိးပကတီၤလီၤကဒွံကျိာ်လၢအမဲာ်ညါလီၤ.’
ဖဲယရူၤၡလ့ၣ်အစီၤပၤဟ့ၤရိာ် နၢ်ဟူဘၣ်ဝဲဘၣ်ဃးဒီး စီၤပၤလၢအသီတဂၤအံၤအဂ့ၢ်အခါ အဝဲဘၣ်ယိၣ်တၢ်ဒိၣ်မးလီၤ. စီၤပၤဟ့ၤရိာ်သံကွၢ်ဝဲ ပှၤလုၢ်တၢ်အဒိၣ်တဖၣ်လၢ– ‘စီၤပၤလၢအသီတဂၤန့ၣ် အိၣ်ဖျဲၣ်ထီၣ်ဝဲလၢတၢ်လီၢ်ဖဲလဲၣ်.’ အဝဲသ့ၣ်တဲဘၣ်က့ၤ စီၤပၤဟ့ၤရိာ်လၢ– ‘ဝံတဖၣ်တဲဆိပာ်ဝဲလၢ ဖိသၣ်န့ၣ် ကအိၣ်ဖျဲၣ်ထီၣ်ဝဲလၢ ဘ့ၤသလ့ဃ့ၣ်အပူၤလီၤ.’ လၢတၢ်န့ၣ်အဃိ စီၤပၤဟ့ၤရိာ်ကိးန့ၢ်ဝဲ ပှၤအိၣ်ဟဲလၢမုၢ်ထီၣ်တဖၣ်အံၤ ဒီးတဲဘၣ်အဝဲသ့ၣ်လၢ– ‘လဲၤလၢဘ့ၤသလ့ဃ့ၣ်ဒီး ဃုထံၣ်န့ၢ်ဖိသၣ်, ဝံၤဒီးဟဲက့ၤတဲဘၣ်ယၤလၢ ဖိသၣ်အိၣ်ဖဲလဲၣ်န့ၢ်တက့ၢ်. ယအဲၣ်ဒိးလဲၤတီၤလီၤကဒွံကျိာ် လၢအမဲာ်ညါစ့ၢ်ကီးလီၤ.’ ဘၣ်ဆၣ် စီၤပၤဟ့ၤရိာ်လီတၢ်လီၤ.
ဖဲန့ၣ်အခါ “ဆၣ်” တဖျၢၣ်န့ၣ် စးထီၣ်လဲၤကဒီးတၢ် ဒီးဆှၢအဝဲသ့ၣ်တုၤလၢ ဘ့ၤသလ့ဃ့ၣ်လီၤ. “ဆၣ်” တဖျၢၣ်အံၤအိၣ်ပတုာ်ဝဲလၢ ဟံၣ်တဖျၢၣ်အဖီခိၣ်ဒီး အဝဲသ့ၣ်လဲၤနုာ်ဝဲလၢဟံၣ်ပူၤလီၤ. အဝဲသ့ၣ်ထံၣ်ဘၣ်ဝဲ ယ့ၣ်ၡူးဒီးအမိၢ်နီၢ်မၤရံလီၤ. ဝံၤဒီးအဝဲသ့ၣ် တီၤလီၤကဒွံကျိာ် လၢဖိသၣ်အမဲာ်ညါ ဒီးဟ့ၣ်လီၤအီၤလၢထူ, လီၢ်ဘၣ်ဒီးမူရၣ်လီၤ. မ့ၢ်ယဟိဝၤယွၤဆှၢလီၤ ပှၤတဖၣ်အံၤဆူယ့ၣ်ၡူးအအိၣ်ဧါ. ယဟိဝၤယွၤ တဆှၢလီၤဝဲဘၣ်.
ဖဲနၤအဝဲန့ၣ် ယဟိဝၤယွၤတဲဘၣ် စီၤယိၤသးလၢတၢ်မံမီၢ်အပူၤလၢ– ‘စီၤပၤဟ့ၤရိာ်အဲၣ်ဒိးမၤသံယ့ၣ်ၡူးလီၤ. အဃိ ကိးထီၣ်နမါဒီးနဖိခွါ ဒီးလဲၤဃ့ၢ်ဆူကီၢ်အဲၤကူပတူးအပူၤတက့ၢ်. နဘၣ်အိၣ်ဖဲန့ၣ် တုၤလၢယတဲနၤလၢ တၢ်အိၣ်သး မုာ်ထီၣ်က့ၤလီၤ.’ တဘျီဃီန့ၣ် စီၤယိၤသးဒီးအဟံၣ်ဖိဃီဖိ လဲၤဝဲဆူကီၢ်အဲၤကူပတူးလီၤ.
ယဟိဝၤယွၤ တဲဘၣ်ပှၤအိၣ်ဟဲလၢမုၢ်ထီၣ်တခီလၢ အဝဲသ့ၣ်တဘၣ်က့ၤလၢ စီၤပၤဟ့ၤရိာ်အအိၣ်လၢၤဘၣ်. ခီဖျိလၢ ပှၤအိၣ်ဟဲလၢမုၢ်ထီၣ်တဖၣ်အံၤ တဟဲက့ၤဆူ စီၤပၤဟ့ၤရိာ်အအိၣ်အဃိ အဝဲသးပှံၢ်ထီၣ်တၢ်ဒိၣ်မးလီၤ. စီၤပၤဟ့ၤရိာ် ဃုယ့ၣ်ၡူးတဘၣ်ဘၣ်အဃိ အဝဲဟ့ၣ်လီၤတၢ်ကလုၢ်လၢ ပှၤကဘၣ်မၤသံကွံာ်ကယဲၢ် ပိာ်ခွါဖိသၣ်လၢ အသးနံၣ်ဘူးကထဲသိးဒီးယ့ၣ်ၡူးလီၤ. ဘၣ်ဆၣ် မ့ၢ်လၢယ့ၣ်ၡူးအိၣ်ဝဲလၢ ကီၢ်အဲၤကူပတူးအပူၤအဃိ အဝဲပူၤဖျဲးဝဲလီၤ.
ဖဲစီၤပၤဟ့ၤရိာ် သံဝံၤအလီၢ်ခံ ယဟိဝၤယွၤတဲဘၣ် စီၤယိၤသးလၢ– ‘ခဲအံၤ နက့ၤဆူနကီၢ်သ့လံ.’ စီၤယိၤသး, နီၢ်မၤရံဒီးယ့ၣ်ၡူးန့ၣ် က့ၤဝဲဆူကီၢ်အံၣ်စရ့လး ဒီးလဲၤအိၣ်ဝဲလၢဝ့ၢ်နစၤရ့းအပူၤလီၤ.
“ယတၢ်ကတိၤလၢ အဟဲထီၣ်လၢ ယထးခိၣ်ကမၤအသးဒ်န့ၣ် . . . ကဒုးကဲထီၣ်တၢ်လၢ ယမၢအမၤတၢ်န့ၣ်လီၤ.”—ယၡါယၤ ၅၅:၁၁